אמעריקע און ווענעזועלא שרייבן אונטער א היסטארישע מיליטערישע אפמאך: העגסעט מעלדט איבער טרענירונגען, אינטעלידזשענס און מאדערניזירונג
היסטארישער אפמאך: אמעריקע און ווענעזועלע פאראייניגן זיך מיט א נייעם מיליטערישן קאאפעראציע דיעל
די פאראייניגטע שטאטן און ווענעזועלע האבן אונטערגעשריבן אן אפיציעלן מיליטערישן קאאפעראציע אפמאך וואס איז געצילט צוריקצושטעלן די פארטיידיגונגס באציאונגען צווישן די צוויי לענדער. דאס צייכנט אפ א דראסטישן טויש אין זייערע באציאונגען נאך לאנגע יארן פון ביטערע פיינטשאפט.
דער אמעריקאנער פארטיידיגונגס סעקרעטאר, פיט העגסעט, האט געמאלדן דעם אפמאך דורכאויס אן אומערווארטעטן באזוך אין די הויפטשטאט קאראקאס דעם 18'טן נאוועמבער, וואו ער האט זיך געטראפן מיט די אינטערימ'ס פרעזידענט דעלסי ראדריגעז און אנדערע הויכראנגיקע ווענעזועלער באאמטע. דער דיעל איז געצילט צו פארשטארקן די מיליטערישע קאאפעראציע, אריינגערעכנט טרענירונגען, טיילן שפיאנאזש אינפארמאציע, און שריט צו פארבעסערן די ווענעזועלער ארמיי און גרעניץ זיכערהייט.
געמיינזאמע קאמף קעגן קרימינאלן
העגסעט האט אראפגעלייגט דעם אפמאך אלס א צוריקשטעלונג פון די פארטיידיגונגס שותפות צווישן די צוויי לענדער. ער האט געזאגט אז וואשינגטאן וויל צונויפשטעלן די אמעריקאנער מיליטערישע עקספערטיז מיט די ווענעזועלער מעגליכקייטן, כדי זיך צו קענען ספראווען מיט געמיינזאמע סטראשונגען, ווי דראג שמוגלערייען און קרימינאלע נעצן. העגסעט האט אויך אנגעוויזן אז די נאנטע מיליטערישע קאאפעראציע וועט העלפן ווענעזועלע צוריקבאקומען קאנטראל אויף אירע גרעניצן און טעריטאריעס פון קרימינאלע און נארקא-טעראריסטישע גרופעס, וואס גייט אין איינקלאנג מיט די צילן פון די אדמיניסטראציע צו באקעמפן ארגאניזירטע פארברעכנס אין דעם ראיאן.
ראדריגעז האט אויפגענומען דעם אפמאך מיט פרייד, זאגנדיג אז די באנייטע קאאפעראציע וועט פארבעסערן די טרענירונגען פאר די ווענעזועלער ארמיי, פארשטארקן זייערע אפעראציאנאלע עקוויפמענט, און געבן צוטריט צו מאדערנע טעכנאלאגיע. די מעלדונג איז א גרויסע דיפלאמאטישע און זיכערהייטס דערגרייכונג פאר די טראמפ אדמיניסטראציע, וועלכע זוכט צו פארברייטערן די אמעריקאנער איינפלוס איבער די מערב האלב-קוגל.
ענערגיע שותפות און פאליטישע איבערקערעניש
דער מיליטערישער אפמאך קומט אינאיינעם מיט א באזונדערע אמעריקע-ווענעזועלע ענערגיע שותפות, וואס נעמט אריין די אנטוויקלונג פון 17 סטראטעגישע אויל פעלדער מיט א געשאצטע רעזערוו פון ביליאנען פעסלעך אויל. דאס שטעלט ווענעזועלע אין צענטער פון וואשינגטאן'ס ברייטערע סטראטעגיע אין דעם ראיאן. דערווייל האבן אבער באאמטע נאכנישט ארויסגעגעבן די פולע דעטאלן פונעם מיליטערישן פאקט, איבערלאזנדיג וויכטיגע פראגעס אומפארענטפערט איבער די פארנעם פון די שפיאנאזש אויסטוישן, טרענירונג פראגראמען, עקוויפמענט טראנספערס און ווען פונקטליך דאס וועט אריינגיין אין קראפט.
דער אפמאך קומט נאכדעם וואס אמעריקאנער קרעפטן האבן אין יאנואר געכאפט דעם געוועזענעם ווענעזועלער פרעזידענט ניקאלאס מאדורא, א שריט וואס האט געפירט צו די אויפשטעלונג פון ראדריגעז'ס אינטערימ'ס פירערשאפט. די פאליטישע איבערגאנג האט אינגאנצן איבערגעמאכט די באציאונגען צווישן די צוויי רעגירונגען.
הגם די נייע שותפות צייגט אויף א מעכטיגע טויש אין די צוויי-זייטיגע קאאפעראציע, מאכט עס נאכנישט ווענעזועלע פאר אן אפיציעלע אמעריקאנער אליאירטע לאנד, און עס באשטעטיגט אויך נישט קיין שטענדיגע אמעריקאנער מיליטערישע אנוועזנהייט אינעם לאנד. פונדעסטוועגן, עפנט דער אפמאך א נייע קאפיטל אין די באציאונגען צווישן וואשינגטאן און קאראקאס, מיט מעגליכע קאנסעקווענצן פאר די לאקאלע זיכערהייט, ענערגיע מארקעטס, און די וואג-שאל פון איינפלוס אין לאטיין אמעריקע.