אומבאמאנטע אטאקע מעגליכקייטן: 'סיסעטס' אינסטאלירט אן 'ענדוריל' מיסיל סיסטעם אויף אן אויטאנאמישע שיפל
נייע טעכנאלאגיע: קליינע אומבאמאנטע שיפלעך וועלן קענען שיסן מיסילס און דראונס אויפ'ן וואסער
די טעכנאלאגיע פירמע 'סיסעטס' (Seasats) האט געמאלדן איבער א סוקסעספולע פראבע וואס זיי האבן דורכגעפירט, וואו זיי האבן מיט סוקסעס אינסטאלירט און ארויסגעשאסן אן 'אלטיוס-600M' קאמיקאזע דראון - פראדוצירט דורך די 'אנדוריל' פירמע - פון זייער 'קוויקפיש' אומבאמאנטע שיפל. די פראבע צייגט ווי אזוי א רעלאטיוו קליינע, אטאנאמישע שיפל קען דינען אלס א מאבילע לאנציר-פלאטפארמע דורכצופירן ווייט-שטרעקיגע אטאקעס אויפ'ן וואסער.
די פראבעס זענען דורכגעפירט געווארן פונעם 17-פוס לאנגן 'קוויקפיש' שיפל, וואס איז ספעציעל דיזיינט צו פליסן אן קיין מענטשליכע מאנשאפט. דאס שיפל קען פארן מיט א שנעלקייט פון איבער 40 נאטס (knots) און קען בלייבן אויפ'ן אקעאן פאר עטליכע וואכן נאכאנאנד. עס פארמאגט א ספעציעלע פארמאכטע אפטיילונג וואס קען שלעפן פארשידענע סארטן וואפן און מיסיע-סיסטעמען.
די 'אלטיוס' דראון וואס ווערט ארויסגעשאסן פונעם שיפל, גיט צו א מעגליכקייט צו אטאקירן צילן ביז ארום 160 קילאמעטער ווייט. די דראון קען שוועבן אין די לופטן פאר אנדערהאלבן שעה און טראגט א 9-פונט אויפרייס מאטעריאל. אינאיינעם צייגט די נייע קאמבינאציע ווי אזוי אומבאמאנטע פלאטפארמעס אויפ'ן ים קענען פארברייטערן די מעגליכקייטן פון עקזיסטירנדע וואפן, אן דארפן נוצן גרויסע קריגס-שיפן וואס פאדערן א גרויסע מאנשאפט.
דער הויפט און מיט-גרינדער פון 'סיסעטס', מייק פלאניגען, האט געזאגט אז די נייע טריט ברענגט א פראקטישע, ווייט-שטרעקיגע אטאקע מעגליכקייט צום 'קוויקפיש' שיפל, וואס ערלויבט אזעלכע קראפטן צו ווערן צעטיילט אויף קלענערע שיפלעך. פאנטעין אלעקסאנדער, א הויפט באאמטער ביי 'אנדוריל', האט צוגעגעבן אז די אויסדויער פונעם שיפל און איר ספעציעלע דיזיין איז א פערפעקטע מעטש פאר זייערע דראונס.
די פירמעס זאגן אז די קאמבינאציע שאפט א גאר מאבילע, אומבאמאנטע לאנציר-פונקט וואס קען געבן פאר די נעיווי קראפטן פיל מער פלעקסיביליטי ביים ארויסשיקן וואפן אויפ'ן ים. דאס שפיגלט אפ א ברייטערע טויש אין די סטראטעגיע פון ים-מיליטערן, וואו מען הייבט אן נוצן מערערע קליינע אטאנאמישע פלאטפארמעס צו שטיצן מיסיעס, אנשטאט זיך צו פארלאזן בלויז אויף ריזיגע טראדיציאנאלע קריגס-שיפן.
כאטש די פראבע איז געווען א גרויסע סוקסעס און צייגט די וואקסנדע ראלע פון אומבאמאנטע שיפלעך אין צוקונפטיגע מיליטערישע אפעראציעס, איז דערווייל נאך נישט קלאר געמאכט געווארן פונקטליך ווי אזוי אדער ווען די נייע אינטעגרירטע סיסטעם וועט אריינגיין אין אפיציעלע באנוץ.