מאמדאני ציט נישט צוריק פון זיין קאנטראווערסיאלע אקטאבער 7 פאוסט: מעיאר ווארפט אפ פאדערונגען צו צעטיילן די חאמאס רציחה פון קריטיק אויף מדינת ישראל
ניו יארק סיטי מעיאר זאהראן מאמדאני אונטער פרישע פייער איבער זיין קאנטראווערסיאלע אקטאבער 7 סטעיטמענט
ניו יארק סיטי מעיאר זאהראן מאמדאני געפינט זיך אונטער פרישע קריטיק נאכן זיך אנטזאגן איבערצוטראכטן זיין קאנטראווערסיאלע סטעיטמענט וואס ער האט ארויסגעגעבן צום יארטאג פון די אקטאבער 7 אטאקעס. דאס קומט נאך א היציגע אויסטויש וואס איז פארגעקומען ביי די 'ניו יארק טיימס דיעל-בוק סאמיט' דעם 18'טן נאוועמבער.
דער מאדעראטאר, ענדרו ראס סארקין, האט דירעקט קאנפראנטירט דעם מעיאר, פרעגנדיג פארוואס ער האט נישט געקענט אפגעבן כאטש איין טאג עקסקלוסיוו צו געדענקען די ארום 1,200 אומשולדיגע מענטשן וואס זענען ברוטאל אומגעברענגט געווארן דורך כאמאס טעראריסטן אום אקטאבער 7, 2023, בעפארן קריטיקירן די מדינת ישראל מיליטערישע רעאקציע אין עזה. די פראגע האט ארויסגערופן א הילכיגן אפלאדיסמענט פונעם עולם, וואס האט אריינגעלייגט מאמדאני אין א פרעשור צו פארענטפערן פארוואס זיין יארטאג מעסעדזש האט אויסגעמישט דאס טרויערן פאר די אידישע קרבנות מיט באשולדיגונגען קעגן די מדינת ישראל רעגירונג.
מאמדאני האט זיך פארענטפערט זאגנדיג אז ער האט זיך באטייליגט ביי אן אסיפת זכרון צו פאראערן די קרבנות פון אקטאבער 7, אבער ער האט טענה'ט אז עס מוז זיין פלאץ צו טרויערן יעדן איינעם וואס איז אפעקטירט געווארן פונעם קאנפליקט. ער האט אויך איבערגעחזר'ט זיין ווילדע באשולדיגונג אז מדינת ישראל באגייט א "גענאציד" אין עזה, טענה'נדיג אז די אקטאבער 7 אטאקעס ווערן גענוצט צו בארעכטיגן אלעס וואס איז נאכגעפאלגט. אנשטאט צו מסכים זיין צו צעטיילן די צוויי נושאים, האט מאמדאני דערקלערט אז זיין פאזיציע שפיגלט אפ א "פאליטיק פון אוניווערסאליטעט," און ער האט זיך געהאלטן ביי זיינס אז ער וועט ווייטער אפלייען די זעלבע פרינציפן סיי פאר די מדינת ישראל בירגער און סיי פאר די פאלעסטינער.
די קאנפראנטאציע האט אויפגעפרישט די קאנטראווערסיע ארום מאמדאני'ס אקטאבער 7 סטעיטמענט, וואס האט בלויז קורצליך פארדאמט די כאמאס אטאקע אלס א שרעקליכע קריגס-פארברעכן, אבער האט געווידמעט דעם גרעסטן טייל פונעם מעסעדזש צו פארדאמען די מדינת ישראל מיליטערישע קאמפיין אין עזה. אידישע ארגאניזאציעס און קהילה פירער האבן שארף קריטיקירט דעם טיימינג און דעם פאקוס, טענה'נדיג אז דער יארטאג פונעם שרעקליכן מאסאקער וואלט געדארפט געבן די מעגליכקייט צו געדענקען די קרבנות און זייערע פאמיליעס אן דעם וואס מען זאל באלד פארוואנדלען די געלעגנהייט אין אן אטאקע קעגן מדינת ישראל.
דורכאויס דעם סאמיט האט סארקין אויך אויפגעברענגט זארגן איבער דעם מעיאר'ס פאראנטווארטליכקייט צו נעמען אין באטראכט וויאזוי זיין שפראך אפעקטירט די אידישע איינוואוינער אין ניו יארק, ספעציעל אין א צייט וואס אנטיסעמיטיזם אין די שטאט איז אויף א שרעקליכן פארנעם. מאמדאני האט געענטפערט אז ער איז שטאלץ צו דינען אלס מעיאר פון וואס ער האט אנגערופן "די מערסט-אידישע שטאט אין די פאראייניגטע שטאטן," און האט צוגעזאגט צו באקעמפן אנטיסעמיטיזם און אלע סארטן האס. דאך האט ער קלארגעשטעלט אז ער גייט נישט טוישן זיין צוגאנג איבער וויאזוי ער רעדט ארום די אקטאבער 7 אטאקעס און די מלחמה אין עזה.
דער אויסטויש ברענגט ארויס דעם ווייטערדיגן שפאלט איבער וויאזוי פאליטישע פירער דארפן אפצייכענען דעם כאמאס מאסאקער בשעת'ן אדרעסירן די שווערע קאנסעקווענצן פון די נאכפאלגנדע מלחמה.