שטורעם נאך וואס דער ניי-ערוויילטער סענאטאר פון מישיגען זאגט אז ער גלייבט נישט אין א "אידישע מדינה"


דער ניי-ערוויילטער סענאטאר פון מישיגען, אבדול על-סאיעד, האט ווידער אויפגעוועקט א שטורעם איבער זיין שטעלונג קעגן מדינת ישראל, נאכדעם וואס ער האט דערקלערט אז ער גלייבט נישט אין לענדער וואס זענען באזירט אויף א ספעציפישע רעליגיע אדער ראסע (עטנא-סטעיטס), ווען ער איז געפרעגט געווארן צו מדינת ישראל דארף פארבלייבן א אידישע לאנד.


ביי אן אינטערוויו מיט קריסטען וועלקער פון די 'ען-בי-סי' (NBC) נייעס אגענטור, איז על-סאיעד דירעקט געפרעגט געווארן צו זיין שטעלונג מיינט אז מדינת ישראל זאל מער נישט עקזיסטירן אלס א אידישע מדינה. "איך זאג אז איך גלייב נישט אין עטנא-סטעיטס," האט ער געענטפערט, צולייגנדיג אז דעמאקראטיע דארף אלעמאל זיין די ערשטע פריאריטעט.


וועלקער האט אים פרובירט אפצופרעגן, אנווייזנדיג אז עס זענען דא צענדליגע לענדער איבער די וועלט וואס אידענטיפיצירן זיך מיט א געוויסע רעליגיע, ברענגענדיג פאקיסטאן אלס א ביישפיל פון אן איסלאמישע רעפובליק. אבער על-סאיעד האט זיך געהאלטן ביי זיינס, זאגנדיג אז ער איז קעגן אזעלכע לענדער אין אלגעמיין, און ער האט צוגעלייגט אז ער האלט טאקע אז אמעריקע זאל אויך נישט פאנדן די פאקיסטאנער מיליטער. זיינע ווערטער האבן פריש געצויגן אויפמערקזאמקייט צו זיינע קאנטראווערסיאלע בליקן איבער מדינת ישראל, יעצט ווען ער גרייט זיך אריינצוטרעטן אין אפיס אלס דער קומענדיגער יו-עס סענאטאר פון מישיגען.


דער אינטערוויו קומט נאך א רייע קאנטראווערסיאלע קאמענטארן אין וועלכע על-סאיעד האט טענה'ט אז מדינת ישראל דארף צושטעלן גלייכע רעכטן פאר אלע בירגער אן זיך דעפינירן דורך א געוויסע קולטור אדער רעליגיע. ער האט אויך געזאגט אז סיי די מדינה און סיי די פאלעסטינער האבן גלייכע רעכטן צו שלום און זעלבסטשטענדיגקייט, לאזנדיג אפן די מעגליכקייט פון א "צוויי-שטאַט לייזונג" אדער אן אנדערע פאליטישע סטרוקטור.


אין א פריערדיגע אינטערוויו האט ער טאקע אנערקענט אז מדינת ישראל האט א רעכט צו עקזיסטירן, אבער ער האט עס באגרעניצט זאגנדיג אז איר צוקונפט דארף ווערן באשלאסן דורך אן אפמאך צווישן די מדינה און די פאלעסטינער. קריטיקירער פון זיין שטעלונג טענה'ן אז דאס אפווארפן די אידישע אידענטיטעט פון די מדינה ברענגט ארויף פראגעס צו ער באהאנדלט די אידישע זעלבסטשטענדיגקייט אויף די זעלבע שטאפל ווי די פאלעסטינער זעלבסטשטענדיגקייט.


דערווייל פרובירט על-סאיעד אראפצולייגן זיין שטעלונג אלס א קאמף פאר גלייכע רעכטן און א קעגנערשאפט צו רעליגיעזע אדער קולטוראלע לענדער, אינדערצייט וואס ער שטעלט אויך אונטער פראגע-צייכן די ווייטערדיגע אמעריקאנער מיליטערישע הילף פאר מדינת ישראל און אנדערע לענדער. זיינע קאמענטארן וועלן ווארשיינליך האלטן זיין צוגאנג צו מדינת ישראל און אמעריקאנער אויסערן-הילף אונטער א שטרענגע פארגרעסערונגס-גלאז ווען ער גרייט זיך אריינצוקומען אינעם סענאט.