בס"ד


א רירנדע מאמענט: משפחת שינדלער קערט זיך צוריק צו זייער איבערגעבויטע היים אין 'כרם שלום' נאך די שמחת תורה אטאקעס


א גאר רירנדע מאמענט האט זיך אפגעשפילט אין קיבוץ כרם שלום, ווען דער צפת'ער רב, הרב שמואל אליהו, האט קובע געווען א מזוזה ביים איבערגעבויטן שטוב פון עמיחי און אביטל שינדלער, כמעט דריי יאר נאכדעם וואס די הויז איז געווען דער צענטער פון א בלוטיגע שלאכט ביי די שמחת תורה אטאקעס.


די הויז פון די שינדלער משפחה איז געשטאנען דירעקט אין וועג פון די כאמאס טעראריסטן וועלכע האבן אינפילטרירט כרם שלום יענעם ביטערן שמחת תורה אינדערפרי. עמיחי און זיין פרוי אביטל האבן זיך באהאלטן אין זייער 'סעיף רום' אינאיינעם מיט זייערע זעקס קינדער, ווען די טעראריסטן האבן זיך איינגעבראכן אין הויז און ארויפגעלייגט אן אויפרייס מאטעריאל אויפן טיר פונעם באשיצטן צימער.


אין א פרואוו צו באשיצן זיין משפחה, האט זיך עמיחי געשטעלט ביים טיר עס צו בלאקירן. דער אויפרייס האט אים איבערגעלאזט קריטיש פארוואונדעט, מיט קאטאסטראפאלע וואונדן צו זיינע הענט און אנדערע קערפער טיילן. ער איז עווענטועל עוואקואירט געווארן מיט אן העליקאפטער צום שיבא מעדיקעל צענטער, בשעת זיין פרוי און אלע זעקס קינדער האבן ברוך השם איבערגעלעבט די אטאקע אומבאשעדיגט.


די הויז אליינס איז זינט דעמאלט אדורך א ברייטע איבערבוי און רענאוואציע פראצעס, אריינגערעכנט ספעציעלע צוגעפאסטע טוישונגען צו קענען אקאמאדירן עמיחי נאך זיינע שווערע וואונדן. דורכאויס די לאנגע רעהאביליטאציע פראצעס האט די משפחה קלארגעמאכט אז זיי פלאנען זיך צוריקצוקערן קיין כרם שלום און נישט איבערצולאזן זייער היים.


דער צוריקקער איז פארגעקומען אין שטאפלען. אין אויגוסט 2025 האט זיך די משפחה צוריקגעקערט צום קיבוץ, אבער האבן זיך קודם אריינגעצויגן אין א צייטווייליגע וואוינונג בשעת די ארבעט אויף זייער ארגינעלע הויז האט אנגעהאלטן. דעמאלט האט אביטל געזאגט אז צוריקקומען צום קיבוץ איז געווען זייער ציל פונעם ערשטן מינוט אן.


יעצט, ווען די רענאוואציעס אויף זייער פערמאנענטע היים איז ענדליך פארטיג געווארן, האט די משפחה דורכגעבראכן נאך א מיילשטיין. א ווידעא פונעם מעמד צייגט ווי הרב אליהו שטייט אינעם איבערגעבויטן הויז, ארומגענומען מיט פאמיליע מיטגלידער און געסט, בעת מ'איז קובע די מזוזה. דאס צייכנט אפ דעם אפיציעלן צוריקקער פון די שינדלער משפחה צו די הויז וואו זייער לעבן האט זיך געטוישט דעם 7'טן אקטאבער.


דער מאמענט טראגט א באזונדערע באדייט, נאכדעם וואס עמיחי אליינס האט פריערדיגע צייטן באטאנט אז דאס איבערבויען און פארברייטערן די חרוב'ע הויז איז די משפחה'ס ענטפער צו די טעראריסטן וואס האבן זיי געוואלט אומברענגען. דורכאויס די בוי-ארבעט איז ער אפילו צוריקגעקומען פיזיש ארויסהעלפן מיט די ארבעט, טראץ זיינע שווערע וואונדן.


פאר די שינדלער משפחה איז דאס פארענדיגן די הויז דער קלימאקס פון א לאנגע און שווערע רייזע וואס האט זיך אנגעהויבן ביי די אטאקע און עמיחי'ס קריטישע עוואקואציע, אדורך א לאנגע ערוויילונג אין שפיטאל און רעהאביליטאציע, דאס זיין פארוואגלט פון זייער קהילה, און ענדליך זייער פעסטע באשלוס צוריק אויפצובויען זייער לעבן אין כרם שלום.