זעט: הראשון לציון הרב דוד יוסף טאנצט ביי די חתונה פון משה ראטענבערג אין בית שמש
הראשל"צ הגאון ר' דוד יוסף ביים טאנצן ביי די חתונה פון באקאנטן עסקן משה ראטענבערג אין בית שמש
מיטוואך ביינאכט איז פארגעקומען אין שטאט בית שמש די גרויסע חתונה פונעם באקאנטן היימישן פאבליק רילעישאנס עסקן, החתן משה ראטענבערג נ"י, וואו עס האט זיך אנגעזען א שיינע צאל רבנים, אדמו"רים און אישי ציבור וועלכע זענען געקומען אפגעבן כבוד און זיך מיטפרייען ביי די שמחה.
א ספעציעלע אויפמערקזאמקייט האט געצויגן ווען דער נייער ראשון לציון, הגאון ר' דוד יוסף שליט"א, איז אנגעקומען פערזענליך צו די חתונה. ווי מען קען זען אויף ווידעא קליפס וואס זענען פארשפרייט געווארן, האט דער ראשל"צ זיך ארויסגעלאזט אין א ווארימע ריקוד מיטן חתן אויפ'ן טאנץ פלאר, אינאיינעם מיט די פאמיליע מיטגלידער, פריינט און געסט וואס האבן מיטגעהאלטן די געהויבענע מאמענטן.
דער חתן משה ראטענבערג איז גאר א באקאנטע פיגור אין די היימישע גאס, זייענדיג אן אקטיווער עסקן אין די פאבליק רילעישאנס (PR) פעלד, און ער פארמאגט גאר נאנטע קשרים מיט פילע רבנים און אדמו"רים איבער דער חסידישער וועלט. דורכאויס די יארן איז ער שוין געזען געווארן אויף צענדליגע בילדער אינאיינעם מיט גדולי ישראל און חשוב'ע פערזענליכקייטן אין די חרדי'שע קהילה.
פריער דעם יאר, ווען ראטענבערג איז געווארן א חתן, האבן די חרדי'שע נייעס קוועלער אים אנגערופן אלס א נאנטער מקורב און משמש בקודש ביי כ"ק אדמו"ר מביאלא שליט"א. דער ביאלא רבי האט דאן אפילו געפראוועט א ספעציעלע לחיים טיש אפצוצייכענען די שמחת האירוסין פונעם נאנטן עסקן.
