בס"ד

נייע 'סמארט גלעסעס' וועט ערמעגליכן צו טייפן בלויז דורך באוועגן די פנים מוסקלען

א 'סטארטאפ' פירמע אין סאן פראנציסקא מיטן נאמען 'די סאבוואקאל קאמפאני' (The Subvocal Company) מעלדט אז זיי האבן סוקסעספול אויפגעטריבן 1.3 מיליאן דאלער צו אנטוויקלען ספעציעלע "סמארט גלעסעס" (קלוגע ברילן) וואס וועט ערמעגליכן פאר באנוצער צו טייפן ווערטער אן דעם וואס מען זאל דארפן ארויסזאגן א ווארט אדער אפילו אנרירן א קיבאורד.

ווי אזוי ארבעט עס? די נייע ברילן זענען אויסגעשטאט מיט קלוגע סענסארס וואס כאפן אויף די קלענסטע באוועגונגען פון די מוסקלען אינעם פנים ווען א מענטש פארמירט ווערטער אין מויל אינגאנצן שטילערהייט. דערנאך קומט אריין די 'עי-איי' (AI - ארטיפישעל אינטעלידזשענס) טעכנאלאגיע וואס טוישט די באוועגונגען צו טעקסט, וואס דאס לאזט די באנוצער שרייבן מעסעדזשעס אדער קאמיוניקירן מיט א קאמפיוטער גאר גרינג און שנעל.

די קאמפאני זאגט אז זייער נייע טעכנאלאגיע קען פראצעסירן מער ווי 200 ווערטער א מינוט. דערווייל זענען די ברילן נאך אין די אנטוויקלונג פאזע, און די פראצעסירן שנעלקייט וואס זיי זאגן צו איז נאך דערווייל נישט געווארן זעלבסטשטענדיג באשטעטיגט דורך אינדרויסנדיגע עקספערטן.