=דאנערשטאג נצבים וילך - 5:05 נאכמיטאג=

אין די יעצטיגע מינוטן הייבט זיך די פריוואטע פליגער פון כ''ק אדמו''ר מסאטמאר מהר''א שליט''א פונעם ראנאלד רעיגען אינטערנאציאנאלע לופטפעלד אינעם עיר הבירה וואשינגטאן די. סי. 
די פליגער איז ערווארטעט צו לאנדן ארום 5:50 אינעם סטוארט לופטפעלד.

4:30

אין ווייטערדיגע באריכטן: די דעלעגאציע איז אויפגענומען געווארן דורך מרטין מארקעס אינעם "רוזוועלט צימער", גלייך נעבן דעם אוועל אפיס. דער עסקן יוסי געשטעטנער האט גערעדט א פאר ווערטער, און נאך אים האט דער באבובער עסקן יואלי ראזענפעלד פארגעשטעלט די טעמעס פונעם טאג: חינוך, אנטיסעמיטיזם, זיכערהייט, און דאס היטן אויף אידישע בית החיים אין אייראפע.

דערנאך האט גערעדט הגה״צ רבי יעקב בער טייטלבוים שליט״א, אב״ד סיגוט. אינמיטן האט זיך אויך דער וויצע פרעזידענט דזשיי. די. ווענס אנגעשלאסן אין דער זיצונג.

שפעטער זענען די רבנים אריין אינעם אוועל אפיס. קאנגרעסמאן מייק לאולער האט פארגעשטעלט די רבנים פאר פרעזידענט טראמפ און געזאגט אז זיי זענען די גרעסטע מנהיגים פון אידנטום.

טראמפ האט זיך געוויצלט: "איר גייט זען אז מיר גייען געווינען?"

דערנאך האט דער סאטמארער רבי פון קרית יואל אנגעוואונטשן א ברכה, וואס ר' גדליה סגאנדין האט איבערגעזעצט אויף ענגליש. דער רבי האט אויך אויפגעברענגט די נושא פון אידישע ארעסטאנטן אין תפיסה, און ווען טראמפ האט דערמאנט זיין שטיצע פאר מדינת ישראל, האט דער סאטמארער רבי מעורר געווען איבער די גרויסע פראבלעם פון די גזירת הגיוס פאר ישיבה בחורים.

4:00

אינערליכע און לעבעדיגע באריכטן איבער דער היסטארישער זיצונג פון גדולי האדמורי״ם אינעם ווייסן הויז: אלע געהויבענע געסט, די אדמורי״ם פון די זעקס גרעסטע קהילות אין די היימישע געגנטער אינאיינעם מיט דעם לעקוואודער ראש הישיבה, זענען שוין ברוך השם אנגעקומען אין בנין פון די ווייסע הויז. די אנקומען האט זיך אנגעהויבן בערך פערטל נאך איינס און האט זיך פארצויגן ביז די שפעטערע שעה׳ן צוליב פארשידענע פארשפעטיגונגען מיט די פליגערס, אבער אלע מנהיגי העדה זענען בשלום אנגעקומען צו דער היסטארישער אסיפה.

ביים אנקומען זענען די רבנים אויפגענומען געווארן דורך די ווייסע הויז באאמטע, וואו עס זענען ערשט פארגעקומען קורצע פריוואטע שמועסן, און איינמאל אלע אדמורי"ם זענען אנגעקומען, האט זיך די דעלעגאציע אראפגעזעצט צום אפיציעלער זיצונג וואס איז געעפנט געווארן דורך א אידישער דירעקטאר אינעם ווייסן הויז.

דער טיש אינעם קאנפערענץ זאל איז געווען אויסגעשטעלט לויט דער ברייט, ווען אויבן אן אין דער מיט פונעם טיש איז געזעסן דער ווייסער הויז ראטגעבער פאר אידישע אנגעלעגנהייטן. צו זיין רעכטער זייט איז געזעסן כ״ק אדמו״ר מסאטמאר שליט״א (מהר״א), און צו זיין לינקער זייט איז געזעסן כ״ק אדמו״ר מסאטמאר שליט״א (מהרי״י).

פארזעצנדיג דעם סדר, נעבן דעם סאטמארער רבי פון וויליאמסבורג איז געזעסן כ״ק אדמו״ר מוויזשניץ שליט״א פון מאנסי, און נעבן אים איז געזעסן הגאון רבי אהרן מנחם מענדל טווערסקי שליט״א. אויף דער אנדערער זייט, נעבן דעם סאטמארער רבי פון קרית יואל, איז געזעסן כ״ק אדמו״ר מבאבוב שליט״א, און נעבן אים אויפן אנדערן עק פונעם טיש איז געזעסן דער לעקוואודער ראש הישיבה הגאון רבי מלכיאל קאטלער שליט״א.

3:50

דער סאטמארער עסקן ר' יואלי לאנדא האט אנגעפירט אן אקציע צו שרייבן א וויכטיגן בריוו פאר פרעזידענט טראמפ איבער די גזירות הגיוס און די געלט שטראפן אין ארץ ישראל. צום בריוו האבן שוין מסכים געווען די רביס פון גור, ויזשניץ, און בעלזא, צוזאמען מיט הרב יצחק יוסף, הרב דוב לאנדא, און הרב משה הלל הירש.

אבער אין די לעצטע מינוט, ווייל די שטוב מענטשן פון די רבנים האבן זיך נישט גוט דורכגערעדט, איז דער פלאן דורכגעפאלן און דער בריוו איז נישט געשיקט געווארן.

די הויפט זאכן וואס מען האט געפאדערט אינעם בריוו זענען געווען:

אפשטעלן די שטראפן וואס טשעפען די פאמיליעס און קינדער.

היטן אויף די ערוואקסענע און אידישע רעכטן פון די חרדים.

געבן גלייכע רעכטן אין געלט שטיצע ארבעט, און שטיצע פאר מוסדות.

נישט נוצן דעם מיליטער שטריט אלס שטראפ פאר דעם גאנצן ציבור.

אנשטעלן א וויכטיגן באאמטן אינעם ווייסן הויז וואס וועט זיין אין דירעקטן קאנטאקט מיט די חרדישע פירער.

=דאנערשטאג נצבים וילך 3:45 נאכמיטאג= 

אין די יעצטיגע מינוטן פארלאזט כ''ק אדמו''ר מסאטמאר מהר''א שליט''א די ווייסע הויז נאכ'ן היסטארישע פרעזידענטליכע אויפנאמע דורכ'ן פרעזידענט יר''ה אויפן וועג צום ראנאלד רעיגען אינטערנאציאנאלע לופטפעלד אינעם עיר הבירה וואשינגטאן די. סי. פון ווי דער רבי וועט אהיימפארן מיט די פריוואטע פליגער קיין סטוארט לופטפעלד.

3:00

די זיצונג האט זיך געענדיגט.

כ"ק מרן האדמו"ר מהר"א מסאטמאר שליט"א האט פארברענגט בערך 10 מינוט אין א פריוואטע זיצונג אליין מיטן פרעזידענט.

דער פרעזידענט האט געזעסן מיט די רבנים פאר בערך א האלבע שעה.

צווישן אנדערע האט טראמפ געפרעגט די צוויי סאטמאר רבי'ס צו זיי זענען צווילינג זיי האבן גענטפערט אז זיי זענען ברועדער

אזוי אויך האבן זיך כ״ק האחים האדמורים מסאטמאר שליט״א זיך באגריסט און אויסגעטוישט א קורצע שמועס נאכן ארויסגיין פון די אסיפה.

3:00

פרישער באריכט: כ"ק מרן האדמו"ר מהר"א מסאטמאר שליט"א האט נארוואס געענדיגט א פריוואטע אסיפה פנים אל פנים מיטן פרעזידענט טראמפ ירום הודו, וואס האט זיך פארצויגן פאר קרוב צו 10 מינוט.

2:20

אין די קאר אויפן וועג פון די עירפארט צום עיר הבירה וואשינגטאן, אינאיינעם מיט די מקורבים, האט האדמו"ר מבאבוב שליט"א געבעטן צו זינגען די ניגון ותערב, ושם נעבדך ביראה כימי עולם. זאגנדיג אז ווען מ'זעהט די עיר הבירה פון די אומות העולם דארף מען געדענקען פון ירושלים עיה"ק.

2:10

בעת די היסטארישע אסיפה קומט פאר אינעווייניג, האט ר' יואל ווערטהיימער, פון די הויזגעזענד פון כ"ק מרן האדמו"ר מהר"א מסאטמאר שליט"א, פארטיילט קאלטע משקאות פון דעם רבינ'ס קאר פאר דעם ציבור וואס איז פארבליבן ווארטן אינדרויסן פון ווייסע הויז.

2:00

כ"ק מרנן האדמו"רים מסאטמאר און באבוב שליט"א זענען נארוואס אנגעקומען צום באקאנטן 'וועסט ווינג' געביידע אינעם ווייסן הויז, וואו עס געפינט זיך דער אוועל אפיס, לקראת די היסטארישע זיצונג מיט פרעזידענט טראמפ.

1:50

כ''ק אדמו''ר מסאטמאר מהר''א שליט''א ביים אנקומען אינעם ראנאלד רעיגען אינטערנאציאנאלע לופטפעלד אינעם עיר הבירה וואשינגטאן די. סי. האט עם אפגעווארט די קרית יואל'ע קאנגערסמאן פעט רייען,

=דאנערשטאג נצבים וילך 1:40 נאכמיטאג= 

אין די יעצטיגע מינוטן קומט כ''ק אדמו''ר מסאטמאר מהר''א שליט''א אן אינעם ווייסן הויז צום היסטארישע פרעזידענטליכע אויפנאמע דורכ'ן פרעזידענט יר''ה.

"עיני עמך בם תליות" 

1:30

האדמו"ר מסאטמאר אנקומענדיג קיין וואשינגטאן, וואו דער רבי האט זיך געטראפן מיטן באקאנטן קאנגרעסמאן פעט רייען וועלכער פארטרעט קרית יואל.

1:15

בכבוד מלכים זענען די גדולי האדמו"רים שליט"א נארוואס אריינגעגאנגען אין בנין הבית הלבן לקראת די היסטארישע אסיפה מיט פרעזידענט טראמפ, ווען אין די יעצטיגע מינוטן שטייט אויך כ"ק אדמו"ר מסאטמאר מהר"א שליט"א גרייט אריינצוגיין אינעם ווייסן הויז צו אנטיילנעמען ביי די באגעגעניש.

1:05

האדמורי"ם מסאטמאר און באבוב זענן יעצט אנגעקומען אינעם דאלאס לופטפעלד אין וואשינגטאן די סי.

=דאנערשטאג נצבים וילך 1:00 אזייגער נאכמיטאג=

אין די יעצטיגע מינוטן לאנדעט די פריוואטע פליגער פון כ''ק אדמו''ר מסאטמאר מהר''א שליט''א אינעם ראנאלד רעיגען אינטערנאציאנאלע לופטפעלד אינעם עיר הבירה וואשינגטאן די. סי. ווי דער רבי וועט צופארן א וועג פון ארום 10 מינוט צום ווייסן הויז צום היסטארישע פרעזידענטליכע אויפנאמע דורכ'ן פרעזידענט יר''ה.

"היה עם פיפיות שלוחי עמך בית ישראל"

12:45

די פליגער פון האדמורים מסאטמאר שליט"א וויליאמסבורג, האדמור מבאבוב שליט"א און האדמור מזוויזניץ מאנסי שליט"א, האבן נארוואס געלאנדעט אין וואשינגטאן די-סי.

12:40

ראש ישיבה בית מדרש גבוה ד'לעיקוואוד הגאון ר' מלכיאל קאטלער שליט"א בייים אנקומען צום גרויסן היסטארישע אסיפה מיט גדולי האדמורי"ם אינעם ווייסע הויז

דרוקט דא צו זעהן 

12:35

אין די יעצטיגע מינוטן, שטייענדיג שוין ביי די טויערן פונעם ווייסן הויז לקראת די באגעגעניש מיט פרעזידענט טראמפ, קומט אריין א דראמאטישע באריכט: אלס רעזולטאט פון א שווערע דרוק דורך ישראל'דיגע ארגאניזאציעס, האבן די הויפן פון די אדמו"רים באקומען א קלארע פארארדענונג פונעם ווייסן הויז אינגאנצן אויסצומיידן דעם שטורמישן נושא פון 'גיוס בני הישיבות', און דאס בכלל נישט ארויפברענגען ביים שמועס מיטן פרעזידענט.

12:30

הרה"צ ר' אהרן מענדל ביים אנקומען צום היסטארישע אסיפה מיט גדולי האדמורים אינעם ווייסע הויז

דרוקט דא צו זעהן 

12:25

אין דער צייט וואס די היסטארישע אסיפה הייבט זיך אן אינעם ווייסן הויז, גרייטן זיך די גדולי האדמו"רים איבערצוגעבן פאר פרעזידענט טראמפ א ספעציעלן בריוו וואס איז אונטערגעשריבן געווארן דורך א רייע רבנים פון ארץ ישראל. דער דאזיגער בריוו אלארמירט שארף איבער די שטייגנדע ארעסטן אין די גרונט רעכטן פונעם חרדי'שן ציבור אין מדינת ישראל, מיטן ציל ארויפצוברענגען דעם ברענענדיגן נושא דירעקט אויפן פרעזידענטליכן טיש.

12:20

קאנגערעסמאן מייק לאוילער קומט יעצט אינעם ווייסע הויז צום היסטארישע מיטינג מיט די רבנים- זעט בילדער

11:45

כ''ק אדמו"ר מוויזניץ מאנסי שליט''א איז עטליכע מינוט צירוק אנגעקומען צום טיטערבארא לופטפעלד, אונטערוועגנס קיין וואשינגטאן די סי, צום היסטארישן באגעגעניש מיטן פרעזידענט.

דאנערשטאג נצבים וילך 11:30 אינדערפרי

אין די יעצטיגע מינוטן הייבט זיך די פריוואטע פליגער פון כ''ק אדמו''ר מסאטמאר מהר''א שליט''א אויפ'ן וועג צום ראנאלד רעיגען אינטערנאציאנאלע לופטפעלד אינעם עיר הבירה וואשינגטאן די. סי. 
די פליגער איז ערווארטעט צו לאנדן ארום 12:20, ווי דער רבי וועט צופארן א וועג פון ארום 10 מינוט צום ווייסן הויז. 
"כי מלאכיו יצוה לך לשמרך בכל דרכך"

11:15

ביי כ"ק האדמו"ר מבאבוב שליט"א פארן מיט זיין זון הרה"צ ר' חיים שלום האלבערשטאם שליט"א, דער גבאי ר' חיים גאלדפינגער הי"ו, און דער עסקן ר' יואל ראזענפעלד הי"ו.

ביי כ"ק האדמו"ר מהרי"י מסאטמאר שליט"א פארן מיט זיין זון הגה"צ אב"ד סיגוט שליט"א, דער גבאי הרה"ח ר' משה פריעדמאן הי"ו, און ר' משה דוד נידערמאן הי"ו.

11:00

די שיירה פון כ"ק אדמו"ר מהר"א מסאטמאר שליט"א אויפן וועג צו די היסטארישע באגעגעניש פון גדולי האדמו"רים מיט פרעזידענט טראמפ. 🎥זעט ווידעא

10:45

לקראת די היסטארישע אסיפה אין וואשינגטאן, וועט כ"ק האדמו"ר מוויזשניץ מאנסי שליט"א אפרייזן אויפן פריוואטן פליגער פונעם נגיד ר' צבי אלימלך פיש הי"ו, צוזאמען מיט זיינע קינדער. די אפיציעלע קבלת פנים אינעם ווייסן הויז איז באשטימט אויף ארום 1:30 נאכמיטאג, ווען צווישן אנדערן ווערט אנגעצייכנט דער אינטערעסאנטער דעטאל אז כ"ק האדמו"ר מהרי"י מסאטמאר שליט"א וועט אנקומען צום באגעגעניש אנגעטון מיט א געווענליכן הוט און נישט מיטן שטריימל.

10:30

לקראת די היסטארישע אסיפה אין ווייסן הויז: כ"ק האדמו"ר מהר"א מסאטמאר שליט"א וועט אפרייזן אינאיינעם מיט זיין זון הגה"צ ר' מנחם מענדל טייטלבוים שליט"א. אין דער זעלבער צייט וועלן כ"ק האדמו"ר מהרי"י מסאטמאר שליט"א און כ"ק האדמו"ר מבאבוב שליט"א פליען אינאיינעם אויפן פריוואטן פליגער פונעם נגיד ר' ליפא פריעדמאן הי"ו, באגלייט דורך זייערע קינדער און די נאנטע משב"קים.

10:15

א דעלעגאציע פון אדמו"רים און ראשי ישיבות פון איבער אמעריקע וועט זיך היינט טרעפן אויף א האלבע שעה מיט פרעזידענט טראמפ אינעם ווייסן הויז. צווישן די הויפט טעמעס וואס וועלן ארויפגעברענגט ווערן אויפן טיש פונעם אוועל אפיס: ענינים פון פדיון שבוים, די שווערע צושטאנד פון אידישע ארעסטאנטן, און דאס פארשטערקערן דעם קשר מיטן חרדי'שן ציבור לקראת די קומענדיגע 'מידטוירם' וואלן.

10:00

לקראת די היסטארישע באגעגעניש מיט פרעזידענט טראמפ אינעם ווייסן הויז וואס איז באשטימט פאר 12:30 נאכמיטאג, וועלן כ"ק האדמו"ר  מסאטמאר מהרי"י שליט"א און כ"ק האדמו"ר מבאבוב שליט"א אפרייזן אינאיינעם אום 10:30 אינדערפרי פונעם 'טעטערבארא' לופטפעלד אויפן פריוואטן פליגער פונעם נגיד ר' ליפא פריעדמאן הי"ו. נאך א קורצע צייט פון 40 מינוט, וועט דער פליגער לאנדן אינעם 'דאלעס' לופטפעלד אין וואשינגטאן, פון וואו די דעלעגאציע וועט ווייטער פארזעצן אין א שיירה דירעקט צום ווייסן הויז.