א היסטארישע און גאר עמאציאנעלע שמחת הבר מצוה איז די טעג פארגעקומען, ווען דער לעכטיגער חתן הבר מצוה, הבחור החשוב אלימלך העניך יהודה וויינגארטן ני"ו, אן אייניקל פון יבלחט"א כ"ק אדמו"ר מקאשוי שליט"א און גאב"ד טערצאל שליט"א, איז אריינגגעגאנגען בעול המצוות. די שמחה האט מיט זיך געטראגן א באזונדערע משמעות פון חירות און גאולה, נאכדעם וואס דער בחור'ל איז ב"ה באפרייט געווארן פון די  ברוטאלע 'לב טהור' קולט.

דער חתן הבר מצוה האט אין זיינע אינגע יארן מיטגעמאכט גיהנום אויף דער וועלט. ער האט געליטן שווערע און ביטערע עונשים אין 'לב טהור', און שפעטער ווען מ'האט געפירט א שווערן געריכטליכן קאמף אים ארויס צו נעמען פון די שעלטערס, האבן זיינע עלטערן - וועלכע זענען ליידער פארכאפט אין די קולט - אים פארשלעפט קיין קאלאמביע וואו ער האט ווייטער מיטגעמאכט שווערע יסורים. ברוך השם אז מיט די הילף פון זיינע געטרייע זיידע באבע, פעטערס און מומעס, איז ער ארויסגעראטעוועט געווארן פון די גרויזאמע הענט און האט באקומען א צווייטע שאנס אויף א גליקליכן לעבן.

א ספעציעלער הויכפונקט פון נחת און התרגשות ביי די שמחה איז געווען ווען א אינגעלע פון דריי יאר אלט האט באקומען זיינע הייליגע פיאות, א שריט וואס איז אדורכגעפירט געווארן טראץ די שווערע ווידערשטאנד מצד זיינע עלטערן וואס האבן געקעמפט דערקעגן. היינט צו טאגס וויל דער בחור מער נישט הערן אדער וויסן פון לב טהור; ער לערנט די הייליגע תורה צווישן ערליכע אידן און פירט אן אמת'דיג אידיש לעבן מתוך שמחה. יעדער וואס האט זיך באטייליגט ביי די בר מצוה האט געקענט זען דעם לעכטיגן שמייכל פון הכרת הטוב אויף זיין פנים פאר די וועלכע האבן אים געראטעוועט.

ביי די געהויבענע שמחה זענען זיך צוזאמגעקומען פילע חשוב'ע פערזענליכקייטן מיטצופרייען מיט די משפחה. צווישן די אנוועזנדע זענען געזען געווארן:

הרב חיים צבי נעש, וועלכער האט אויך איבערגעגעבן א ספעציעלע מתנה פארן חתן הבר מצוה.

הרב יואל יהושע העשיל בלום

הרב ר' אברהם גרינהוט

הרב יואלי גרינבוים

די בר מצוה האט איבערגעלאזט א טיפע רושם ביי אלע משתתפים, זעענדיג בחוש ווי די פלאג פון די משפחה האט זיך אויסגעצאלט און "הזורעים בדמעה ברינה יקצורו".