בס"ד


טראגיש: זון פון מדינת ישראל אמבאסאדאר קיין אמעריקע שווער פארוואונדעט אין טעראר אטאקע אויף רוט 443


עס איז באקאנט געווארן אז דער זעלנער וואס איז שווער פארוואונדעט געווארן ביי די שוידערליכע טעראר אטאקע מיטוואך אויף רוט 443, איז נריה דוב לייטער, דער זון פונעם מדינת ישראל אמבאסאדאר קיין אמעריקע, יחיאל לייטער.


דער 30-יעריגער נריה האט געליטן א שווערע קאפ-וואונד בעת די קאר-אראפפאר אטאקע, און איז אפגעפירט געווארן צום 'שערי צדק' שפיטאל אין ירושלים אין א קריטישן צושטאנד. ער געפינט זיך דארט באוואוסטלאז און איז אנגעשלאסן צו א רעספירעיטאר, און זיין מצב איז דערווייל נאך אלס גאר שווער.


זיין פאטער, דער אמבאסאדאר, האט איבערגעגעבן אז די מעדיצינישע שטאב אין שפיטאל קעמפן מיט אלע כוחות צו ראטעווען זיין זון'ס לעבן, און ער האט זיך געוואנדן צום ציבור מיט א הארציגע בקשה צו מתפלל זיין פאר זיין ערהוילונג.


"איך גלייב אין דעם כח פון תפילה, און איך גלייב אז ווען כלל ישראל פאראייניגט זיך, פאסירן ניסים. נריה ברויך יעצט א נס," האט דער פאטער געזאגט.


די יעצטיגע פאסירונג איז פיל פאכיג שווערער פאר די לייטער פאמיליע, וועלכע האבן שוין ליידער געליטן א שרעקליכן פארלוסט ווען נריה'ס עלטערע ברודער, משה ידידיה לייטער הי"ד, איז אומגעקומען אין די שלאכטן אין עזה אין נאוועמבער 2023. טראץ דעם שווערן פארלוסט פון זיין ברודער, האט נריה ווייטער פארגעזעצט צו דינען אין די רעזערוון. לויט זיין פאטער האט ער אפגעדינט הונדערטער טעג אין רעזערוו דינסט זינט יענע צייט.