"ער איז מיין סארט מענטש": פרעזידענט טראמפ לויבט אויס דעם העלדישן פאסאזשיר וואס האט געראטעוועט די פליי-דובאי פליגער


פרעזידענט דאנאלד טראמפ האט ארויסגעשטעלט א ווידעאו וואו ער לויבט אויס דעם איזרעלישן פלאמער, יניב חיון, פאר זיין ראלע אין ראטעווען די פליי-דובאי פליגער וואס איז געווען אויפ'ן וועג קיין תל אביב, דורכאויס די דראמאטישע אטאקע אין די קאקפיט פארגאנגענע וואך.


אין די ווידעאו גראטולירט טראמפ דעם פאסאזשיר און רופט זיך אן אלס א "גרויסע פען" זיינער. ער האט אים אויסגעלויבט פאר'ן אריינשטורעמען אין די קאקפיט און העלפן סטאביליזירן דעם פליגער בעת עס האט אנגעהויבן פאלן דורכאויס די עמערדזשענסי.


"ער איז מיין סארט מענטש," האט טראמפ געזאגט, און צוגעלייגט אין א ווערטל אז חיון "קען זיין מיין פלאמער." דער פרעזידענט האט אים אנגערופן א העלד און אויך איבערגעגעבן גראטולאציעס פאר זיין פאמיליע.


חיון איז געווען צווישן די פאסאזשירן וועלכע האבן זיך אריינגעמישט אויף די פליי-דובאי פליט FZ1073, נאכדעם וואס דער קא-פילאט האט אינמיטן וועג אטאקירט און געשטאכן דעם הויפט קאפיטאן. חיון איז אריינגעלאפן אין די קאקפיט, געהאלפן אראפנעמען דעם אטאקירער פון די קאנטראלס, און דערנאך צוריקגעצויגן די קאנטראלס בעת דער פליגער האט געהאלטן אינמיטן טראסקענען. אן אנדערער פילאט וואס איז צופעליג געווען אויפ'ן פליגער אלס פאסאזשיר האט דערנאך איבערגענומען און געהאלפן ברענגען דעם פליגער צו א זיכערע לאנדונג אין סאודי אראביע.


שפעטער האט חיון דערציילט אז זיין קענטעניס ווי אזוי זיך אומצוגיין מיט די קאנטראלס איז געקומען פון קוקן א פראגראם איבער פליגער קראכן. זיינע העלדישע שריט, אינאיינעם מיט נאך עטליכע פאסאזשירן, האבן געצויגן ברייטע אויפמערקזאמקייט נאכ'ן אינצידענט.


די ווידעאו פון טראמפ קומט נאכדעם וואס חיון האט זיך געטראפן מיט דעם אמעריקאנער אמבאסאדאר קיין מדינת ישראל, מאיק האקאבי, וועלכער האט אים באדאנקט פאר זיינע אקטן און אים איבערגעגעבן א 'מאגא' הוט אונטערגעשריבן דורך פרעזידענט טראמפ.