שטורמישע הפגנות ביים אריינגאנג צו שטאט אלעד נאך ארעסט פון ישיבה בחור פארן זיך נישט שטעלן צום מיליטער

א מאסיווע הפגנה איז פארגעקומען דעם מיטוואך ביים אריינגאנג צו די שטאט אלעד, נאכדעם וואס א בחור פון ישיבת 'תורה בתפארתה' איז ארעסטירט געווארן און פאראורטיילט געווארן צו זיצן 10 טעג אין א מיליטערישע תפיסה פארן זיך נישט שטעלן צום צה"ל מיליטער.


דער אינצידענט האט זיך אנגעהויבן ווען דער בחור איז לכתחילה אפגעשטעלט געווארן דורך די לאקאלע פאליציי אין כפר סבא איבער א קליינע טראפיק פארלעצונג. ער איז נאכדעם אראפגערופן געווארן צו די ארטיגע פאליציי סטאנציע, וואו די אויטאריטעטן האבן אידענטיפיצירט אז ער איז אן 'עריק' און ווערט געזוכט פארן זיך נישט שטעלן צום מיליטער ווי פארלאנגט.


באלד נאכן אויפדעקן זיין סטאטוס, איז דער בחור אריבערגעפירט געווארן צו די הענט פון די מיליטערישע פאליציי, און איז שפעטער פאראורטיילט געווארן צו 10 טעג אין א מיליטערישע טורמע.


די נייעס איבער דעם ארעסט האט זיך שנעל פארשפרייט און ארויסגערופן א שטורעם ביי די חרדישע קהילה. המונים זענען זיך צוזאמגעקומען אינדרויסן פון די כפר סבא פאליציי סטאנציע צו פראטעסטירן דעם ארעסט.


אין די זעלבע צייט האבן זיך אנדערע פראטעסטירער פארזאמלט נעבן דעם רעננה דזשאנקשאן, וואו די דעמאנסטראנטן האבן בלאקירט די הויפט שאסייען און עס איז געקומען צו קאנפראנטאציעס מיט די פאליציי אפיצירן בעת די אומרוען.


ווי נאר עס איז באקאנט געווארן די שטרענגע אורטייל פון 10 טעג תפיסה, האט אויסגעבראכן א פרישע מאסיווע הפגנה ביים אריינגאנג צו די שטאט אלעד, וואס איז א היים פאר צענדליגע ישיבות און טויזנטער חרדישע משפחות.


די רייע הפגנות שפיגלען אפ די וואקסנדע זארג און אנגעצויגנקייט צווישן די חרדישע ציבור איבער די כסדר'דיגע ארעסטן פון ישיבה בחורים אין פארבינדונג מיט די מיליטערישע גיוס געזעצן.