אל על פלאטע פארברייטערט זיך: באקומט איר 18'טע 'דרימליינער' פליגער אונטערן נאמען "עם ישראל חי"


די 'אל על' לופטליניע האט דעם נאוועמבער 9 אויפגענומען איר 18'טע 'באואינג 787-9 דרימליינער' פליגער אין ארץ ישראל. דער נייער פליגער איז אנגעקומען קיין בן גוריון עירפארט נאכ'ן אפפליען דירעקט פונעם באואינג פאבריק אין טשארלסטאן, סאוט קאראליינע.


ביים אנקומען אין עירפארט איז דער פליגער, וועלכע טראגט דעם רעגיסטראציע נומער 4X-EDO און איז גערופן געווארן מיטן נאמען "עם ישראל חי", אויפגענומען געווארן מיט די טראדיציאנאלע וואסער-שפריץ סאלוט ווי עס איז דער שטייגער ביי נייע פליגערס.


אן אינטערעסאנטע פאקט פונעם ערשטן רייזע איז געווען אז דער פליגער האט גענוצט א ספעציעלע עקאלאגישע ברענשטאף, וואס האט אויסגעמאכט ארום 30 פראצענט פונעם גאנצן ברענשטאף באנוץ אויפ'ן וועג.


דער נייער דרימליינער צייכנט אפ נאך א וויכטיגע מיילשטיין אין די כסדר'דיגע פארברייטערונג פון די אל על פלאטע, וואס וועט צושטעלן מער קאפאציטעט און מעגליכקייטן פאר די לאנגע רייזעס פון די לופטליניע.