היסטארישע סקווירא בית המדרש אין שיכון סקווירא דעמאלירט צו מאכן פלאץ פארן נייעם קאמפלעקס
ענדע פון אן עפאכע: דעמאליציע פונעם היסטארישן סקווירא בית המדרש אין שיכון סקווירא האט זיך אנגעהויבן
דינסטאג, נאוועמבער דעם 10'טן, האבן זיך אנגעהויבן די דעמאליציע ארבעט אויפ'ן היסטארישן גרויסן בית המדרש אין שיכון סקווירא, א שריט וואס צייכנט אפ די ענדע פון אן עפאכע פאר די גאנצע סקווירא קהילה און חסידות.
דער אלטער בנין, וואס האט געדינט אלס דער צענטראלער ווינקל פון די קהילה פאר לאנגע צענדליגע יארן, איז געווארן אפגעשפארט נאכדעם וואס א טייל פונעם דאך איז פלוצלינג איינגעפאלן דעם פארגאנגענעם אוגוסט. בחסדי השם זענען נישט געווען קיין שום פארוואונדעטע אינעם אינצידענט. נאך גרונטליכע אינספעקציעס דורך סטרוקטוראלע עקספערטן און אינזשענירן, איז באשלאסן געווארן אז דער בנין איז מער נישט זיכער זיך צו באנוצן דערמיט און מוז ווערן צוגרונד געלייגט.
אויפ'ן ארט פונעם אלטן בית המדרש וועט איצט געבויט ווערן א פרישער, הערליכער קאמפלעקס. דער נייער פראדזשעקט וועט ארייננעמען א ריזיגן און רחבות'דיגן 'היכל התורה' וואס וועט דינען פאר לימוד התורה, ווי אויך א ספעציעלע 'טיש שטיבל' וואס וועט זיין געווידמעט ספעציעל פאר די גרויסע טישן פון כ"ק אדמו"ר מסקווירא שליט"א און אנדערע צענטראלע פארזאמלונגען פונעם הויף.
