פאלשע קלאנגען איבער א גיוס ארעסט פירט צו נאכטליכע צוזאמענשטויסן מיט די פאליציי אין בית שמש
געוואלדטאטן אין רמת בית שמש ד' נאך פאלשע קלאנגען איבער ארעסטירן א בחור פאר'ן מיליטער
שטורמישע צוזאמענשטויסן האבן אויסגעבראכן אין רמת בית שמש ד' פרייטאג אינדערפרי, נאוועמבער 20, נאכדעם וואס עס האט זיך פארשפרייט א פאלשע קלאנג אז די פאליציי פרובירט צו ארעסטירן א ישיבה בחור איבער מיליטערישע אנגעלעגנהייטן.
דער אינצידענט האט זיך אנגעהויבן ווען פאליציי אפיצירן האבן אפגעשטעלט א 16-יעריגן בחור וועלכער האט לויט די באריכטן געטריבן א קאר אן קיין לייסענס. ווי נאר עס האבן אנגעהויבן צירקולירן קלאנגען אז מען גייט אים איבערגעבן פאר די מיליטערישע פאליציי, האבן זיך צענדליגער איינוואוינער פארזאמלט אויפ'ן ארט צו פראטעסטירן.
די סיטואציע האט זיך שנעל פארוואנדלט אין א כאאס ווען פראטעסטירער האבן אנגעהויבן ווארפן שטיינער און אנדערע חפצים אויף די אפיצירן. א פאליציי קאר איז געשעדיגט געווארן און די אונטערשטע פענסטער איז צעשמעטערט געווארן, ווי אויך איז איין פאליציי אפיציר לייכט פארוואונדעט געווארן.
מג"ב פאליציי זענען אראפגערופן געווארן אלס רעזערוון צום סצענע און האבן גענוצט שאק-גראנאטן (סטאן גרענעידס) צו צעטרייבן דעם המון עם. די פאליציי האט שפעטער קלארגעשטעלט אז דער גאנצער אינצידענט איז בלויז געווען א רוטינע טראפיק אפשטעל, און האט גארנישט געהאט צוטון מיט מיליטערישע רעקרוטירונג.