מיר זאלן נישט וויסן
ב"ה
א האנט פאר חולי ישראל און זייערע משפחות מען קען זיך ליידער נישט פארשטעלן די שווערע מצב אין וואס די משפחות פון חולי ישראל געפינען זיך, זיי שפירן זיך אינגאנצן פארלוירן און דארפן אונזער הילף. דא קומט 'כפים' אריין אינעם בילד. די וואלונטירן קומען אריין און נעמען איבער די לייצעס, און מען טוט אלעס וואס מען קען אז די שטוב זאל ווייטער קענען אנגיין, און אויספירן די פאזיציעס וואס די עלטערן קענען אצינד נישט דורכפירן. אנגעהויבן פון די ערנסטע שטוב-ווירטשאפט, און געענדיגט ביי די פילע קליינע דעטאלן. אלעס ווערט געמאכט אויף א באשיידענע אופן, בהצנע לכת, אנדעם וואס מען זאל קענען מיטהאלטן פונדרויסן וואס עס טוט זיך.
די סערוויסעס פון כפים "אין שפיטעלער". כפים איז דא ארויסצוהעלפן חולי ישראל אין די שפיטעלער. כאטש אין די יעצטיגע מצב העולם לאזט מען נישט אריין קיין שיפטס אין שפיטעלער, ארבעט נאך 'כפים' פיבערהאפטיג פונדרויסן ארויסצוהעלפן די פאציענטן מיט וואס מען קען נאר. מען שיקט אריין פאר די יונגערע קינדער געשמאקע געימס און ליין-מאנטריאל, אינאיינעם מיט געשמאקע עסן, סנעקס און טרינקען. אזוי אויך אין געוויסע מצבים וואס עס יא איז ערלויבט נעמט מען איבער שיפטס. "אין די הייזער". די כפים העלדן מאכן זיכער אז די שטוב-ווירטשאפט זאל ווייטער פארן און אנגיין, טראץ אלע שוועריקייטן ארום און ארום. צווישן די פילע סערוויסעס איז אריינגערעכנט געשמאקע טעגליכע מאלצייטן פאר די גאנצע משפחה, רייניגן דאס הויז און וואשן די וועש. אזוי אויך קומען אריין וואלונטירן און העלפן אכטונג געבן אויף די קינדער, אויב עס פעלט זיך אויס נעמט מען די קינדער צו מעדיקל אפוינטמענטס, און אזוי ווייטער העלפט מען ביזן לעצטן דעטאל. "כפים הייזער". דאס איז הערליך-אויסשטאפירטע הייזער פאר די קינדער, מיט געשמאקע שפילצייג/געימס/ביכער און נאך אונטערהאלטונגען, וואס ווערט גענוצט סיי ארויסצונעמען די משפחה-מיטגלידער, וואו זיי טוען זיך אויפפרישן און שעפן פרישע כוחות, און סיי פאר קינדער-פאציענטן זעלבסט, וואו זיי קענען זיך אויסגעבן און אויסלופטערן. אזוי אויך קענען זיי דארט האבן פארשידענע טעראפי און לימוד פרטי אין א געשמאקע אטמאספער. אזעלכע צענטערן זענען שוין דא אין וויליאמסבורג, בארא פארק און מאנסי.
כפים גיבט א האנט 'כפים' האט א פלאטע פון אריבער 800 וואלונטירן וואס שטייען צוהילף פאר חולי ישראל. בלויז אין די פארגאנגענע יאר האבן מיר געהאט די זכי' ארויסצוהעלפן 155 משפחות, וואו די קאסטן פון א געווענליכע משפחה קומט אויס צו $26,785. ב"ה אז מיר קענען זאגן אז פון אונזער זייט האבן מיר געטון כל מה שביכלתינו ארויסצוהעלפן די משפחות פון חולי ישראל, און דערהערן זייער ביטערע וויי-געשריי פון טיפעניש פון הארץ.
א האנט פאר כפים ווי פאשטענדליך אז אויפצוהאלטן אזא אימפעריע קאסט אפ אסטראנאמישע סכומים און מיר דארפן האבן די הילף פון אחינו בני ישראל אז מען זאל קענען ווייטער ממשיך זיין מיט די הייליגע ארבעט.דעם קומענדיגן מיטוואך און דאנערשטאג משפטים איז כלל ישראל פאראייניגט צום גרויסארטיגן "הענטעלעך קאמפיין". צוצולייגן א האנט פאר כפים, אז זיי זאלן ווייטער קענען געבן א האנט פאר די חולי ישראל ומשפחתם, און זיי ארויסהעלפן אין זייערע אומשטענדן. עס איז זיכער אז אלע תומכים ומסייעים וועלן געהאלפן ווערן מיט שפע ברכה און הצלחה אין אלע עניינים.
