כאמאס אונטערערדישע אימפעריע צעשמעטערט! צה"ל אינזשענירן פארזיגלען צוויי ריזיגע טעראר טונעלן פון איבער 2 קילאמעטער


מדינת ישראל קרעפטן האבן געגעבן נאך א שווערן קלאפ פאר די כאמאס טעראר גרופע, נאכדעם וואס זיי האבן פערמאנענט פארזיגלט צוויי אונטערערדישע טונעלן וואס ציען זיך אויף א שטח פון מער ווי צוויי קילאמעטער אינאיינעם, אין צענטראל און דרום עזה.


די אפעראציע איז דורכגעפירט געווארן דורך קאמפס-אינזשענירן פון די עזה דיוויזיע און די עליטע 'יהלום' איינהייט, אין די שטחים וואס זענען אונטער מדינת ישראל קאנטראל (מזרח פונעם 'געלן ליין'). אנשטאט אויפרייסן די טונעלן מיט עקספלאסיווס, האט דאס מיליטער באשלאסן צו נוצן א זיכערערע און מער בלייבנדע מעטאד, און זיי האבן אנגעפילט די גאנצע לענג פון די טונעלן מיט קאנקריט. דאס מאכט זיכער אז די טעראריסטן וועלן עס מער קיינמאל נישט קענען איבערנוצן, און ס'איז אויך פיל זיכערער פאר די זעלנער וואס פירן דורך די ארבעט.


ווידעא קליפס וואס דאס מיליטער האט ארויסגעגעבן צייגט די טונקעלע, פארשטארקטע טונעלן, אויסגעשטאט מיט זאמד-זעק, הילצערנע שטיצעס, קאנקריט און רערן - א קלארע באווייז אויף די פארגעשריטענע אינפראסטרוקטור וואס כאמאס האט אויפגעבויט פאר א לאנג-טערמין קריג. די טונעלן זענען געווען הויפט אדערן אין די אונטערערדישע נעץ פון די טעראר גרופע, וואס האט זיי געגעבן די מעגליכקייט צו שווערצן וואפן, סופלייס און טעראריסטן אונטער דער ערד אן ווערן באמערקט.


די ארבעט ווערט דורכגעפירט אונטער די ראמען פונעם יעצטיגן פייער-אפשטעל אפמאך, זיך קאנצענטרירנדיג אויף צו נייטראליזירן פארבליבענע געפארן אין די קאנטראלירטע שטחים אן קיין אומנויטיגע עסקאלאציע.


די סוקסעספולע אפעראציע איז א טייל פון די סיסטעמאטישע ארבעט פון צה"ל צו פארניכטן די טונעלן געפאר וואס פלאגט דעם ראיאן שוין יארן לאנג. כאמאס האט אינוועסטירט שווערע מיליאנען אין די אונטערערדישע רוטס אלס א הויפט טייל פון זייער מיליטערישע סטראטעגיע, פארוואנדלנדיג עזה'ס אונטערגרונט אין א באהאלטענע שלאכטפעלד וואו זיי האבן געהאלטן משכונות און דורכגעפירט אטאקעס.


יעדע פארזיגלטע טונעל איז נאך א שריט פאראויס אינעם לאנגן קאמפיין צו צונעמען פון כאמאס די אינפראסטרוקטור אויף וואס זיי פארלאזן זיך, און איז א קלארע באווייז אז די אונטערערדישע טעראר אימפעריע ווערט צוביסלעך אינגאנצן צעווארפן.