כאפט א פחד: א ווייסע פיקאפ טראק פארלירט קאנטראל און שפינט זיך אינמיטן א רעגנדיגע אינטערסעקשאן אין פלארידע


א דעשקעם ווידעא וואס איז לעצטנס פארשפרייט געווארן צייגט דעם שרעקעדיגן מאמענט ווי א גרויסע ווייסע 'פיקאפ טראק' פארלירט קאנטראל און גליטשט זיך אויס (היידראפלעינינג) אינמיטן א רעגנדיגע אינטערסעקשאן אין נעיפלס, פלארידע. די ווידעא, וואס איז רעקארדירט געווארן דעם 15'טן אוגוסט, צייגט ווי דער טראק פארלירט קאנטראל אינמיטן פארן אויף אנגעזאמלטע וואסער, בשעת אנדערע קארס ארום פארן רואיג ווייטער אן קיין פראבלעם.


אין די ווידעא קען מען זען ווי דער דרייווער פונעם טראק גיט א קוועטש דעם גאז אינמיטן מאכן א טורן, און די רעדער פארלירן דעם גריפ אויפן נאסן ראוד. דער טראק הייבט אן שפינען און דרייט זיך אינגאנצן ארום אינמיטן די אינטערסעקשאן, הויפטזעכטליך צוליב די אנגעזאמלטע וואסער אויפן גאס וואס האט צוגעברענגט אז די רעדער זאלן פארלירן טרעקשאן.


אנדערע קארס וואס מ'זעט אין די ווידעא פארן אדורך די אינטערסעקשאן אן קיין שום פראבלעם, וואס דאס צייגט וויאזוי די וועטער קאנדישאנס קענען אפעקטירן יעדע קאר אנדערש, געוואנדן לויט די ספיד, די רעדער, און וויפיל וואסער עס ליגט אויפן ראוד. 'היידראפלעינינג' פאסירט ווען די רעדער קענען נישט אוועקשטופן די וואסער גענוג שנעל, וואס מאכט אז די קאר זאל פארלירן קאנטאקט מיטן ראוד, און איינמאל מ'פארלירט טרעקשאן, קען אפילו א גרויסע טראק ווערן זייער שווער צו קאנטראלירן.


דער אינצידענט דינט אלס א וויכטיגע דערמאנונג פאר דרייווערס וואס פארן אויף די פלארידע ראודס אין די טעג וואס עס גייט א שטארקע רעגן, בפרט ביי אינטערסעקשאנס וואו וואסער זאמלט זיך אן און מ'זעט נישט געהעריג. עקספערטן ראטן אז מ'זאל פארמינערן די ספיד, האלטן א גרעסערע דיסטענס פון אנדערע קארס, און אויסמיידן פלוצלינגדיגע גאז אדער שארפע דרייעס מיטן סטערינג וויל, כדי צו האלטן קאנטראל אויף א נאסע ראוד. וואס האט אויסגעזען ווי א פשוט'ע טורן פאר דעם טראק, האט זיך אין א סעקונדע פארוואנדלט אין א שפינענדיגע קאר אינמיטן טראפיק - א קלארע מעסעדזש אז נאסע ראודס פאדערן עקסטערע פארזיכטיגקייט.