האנדלס קריג פארשטארקט: קאנאדע מעלדט "דאלאר-פאר-דאלאר" טעריפס קעגן אמעריקע נאך דורכפאל פון געשפרעכן

קאנאדע פארשטארקט דראמאטיש איר האנדלס קאנפראנטאציע מיט די פאראייניגטע שטאטן, נאכדעם וואס דער קאנאדישער פרעמיער מיניסטער מארק קארני האט געמאלדן אז זיי וועלן ארויפשטעלן "דאלאר-פאר-דאלאר" נקמה טעריפס אויף אויסגעקליבענע אמעריקאנער פראדוקטן. די נייע שטראף-מיטלען זענען ערווארטעט אריינצוגיין אין קראפט דעם קומענדיגן סעפטעמבער 8, דעם דינסטאג נאך 'לעיבאר דעי', קומענדיג נאך א קראך אין די לעצט-מינוטיגע פארהאנדלונגען צווישן אטאווע און וואשינגטאן. דער שריט קומט אלס רעאקציע נאכדעם וואס די טראמפ אדמיניסטראציע האט ארויפגעלייגט 50-פראצענטיגע טעריפס אויף בערך 20 ביליאן דאלאר ווערד פון קאנאדישע סחורה, א זאך וואס האט שוין אזוי אויך אנגעצויגן די עקאנאמישע באציאונגען צווישן די צוויי לאנגיעריגע האנדלס-שותפים.

לויט ווי פרעמיער קארני גיט איבער, זענען די פארהאנדלונגען צוזאמגעפאלן נאכדעם וואס וואשינגטאן האט ארויסגעשטעלט לעצט-מינוטיגע פאדערונגען וואס קאנאדע האט באטראכט אלס אומאקצעפטירבאר, אריינגערעכנט באדינגונגען וואס וואלטן באגרעניצט קאנאדע'ס מעגליכקייט צו מאכן האנדלס-אפמאכן מיט אנדערע לענדער. אנשטאט זיך אונטערצוגעבן צו די טערמינען, האט די קאנאדישע רעגירונג אפגעשטעלט די געשפרעכן און צוריקגערופן איר פארהאנדלונגס-טיעם, און זיך גענומען גרייטן א פאסיגע רעאקציע צו די נייע אמעריקאנער טעריפס. קארני האט אראפגעשטעלט דעם באשלוס אלס א נויטיגע שריט צו פארטיידיגן קאנאדע'ס עקאנאמישע אינטערעסן, און ער האט צוגעזאגט אז די רעגירונג וועט שטיצן די לאקאלע אינדוסטריעס וואס וועלן ווערן אפעקטירט פונעם קאנפראנטאציע.

די קאנאדישע רעטאליאציע וועט צילן א רייע אמעריקאנער פראדוקטן און אינדוסטריעס, אריינגערעכנט סטיל (שטאל), מילכיגס, אפלייענסעס, אגריקולטור מאשינערי, פאפיר, און עלעקטראניקס. דער קאנפליקט קען אויך שטארק באטרעפן פשוט'ע קאנסומער פראדוקטן און סופליי טשעינס, וויבאלד ביידע רעגירונגען לייגן ארויף טייערערע פרייזן אויף סחורה וואס גייט אריבער דעם גרעניץ. די נייע אמעריקאנער טעריפס נעמען שוין אריין פראדוקטן אנגעהויבן פון וויין און אנדערע אלקאהאלישע געטראנקען ביז האקי עקוויפמענט, בעת וואס קאנאדע'ס ענטפער איז אויסגעשטעלט צו לייגן אן ענליכע עקאנאמישע דרוק אויף די אמעריקאנער פראדוצירער.

די טיימינג מאכט דעם קאנפליקט באזונדער סענסיטיוו, וויבאלד אמעריקע און קאנאדע זענען זייער שטארק פארבונדן עקאנאמיש, וואס מיינט אז די העכערע טעריפס וועלן זיך שפירן ביי פאבריקאנטן, פארמערס, ריטעילערס און קאנסומערס אויף ביידע זייטן פונעם גרעניץ. קאנאדישע באאמטע האבן אונטערגעשטראכן אז די לעצטע שריט זענען בלויז געצילט צו ענטפערן די אמעריקאנער טעריפס און זענען נישט קיין בלינדע שטראף אויף יעדע אמעריקאנער אימפארט. דאך, ברענגט דער דורכפאל פון די פארהאנדלונגען און דער באשלוס צו גיין פאראויס מיט די רעטאליאציע פרישע זארגן צי די צוויי רעגירונגען וועלן קענען פארמיידן אז דער קאנפליקט זאל זיך נישט אויסברייטערן אין א פולשטענדיגע האנדלס-מלחמה.

די גרעסטע פראגע יעצט איז וואס עס וועט פאסירן נאך סעפטעמבער 8. פרעמיער קארני האט אנגעצייגט אז קאנאדע איז גרייט אויסצושטיין א לענגערע דרוק אינדערצייט וואס זיי וועלן זוכן נייע אינטערנאציאנאלע האנדלס-באציאונגען, בעת וואס וואשינגטאן צייגט דערווייל נישט קיין שום צייכנס אז זיי פלאנען זיך צוריקצוציען פון זייערע לעצטע טעריף שריט. מיט ביידע זייטן וואס גרייטן זיך יעצט איינצושלינגען און צוריקצושלאגן די עקאנאמישע קלאפעס, קען די קומענדיגע פאזע באשליסן צי דאס איז בלויז א צייטווייליגע קאנפראנטאציע — אדער דער אנהייב פון א פיל טיפערע שפאלט אין די אמעריקע-קאנאדע עקאנאמישע באציאונגען.