גפני זאגט זיך אפ פון צוזאגן שטיצע פאר נתניהו נאך די קומענדיגע וואלן; רייסט אראפ ש"ס און די רעגירונג ביוראקראטן


דער פאָרזיצער פון יהדות התורה, ח"כ משה גפני, האט זיך אנטזאגט פון צוזאגן אז זיין פארטיי וועט שטיצן פרעמיער מיניסטער בנימין נתניהו נאך די קומענדיגע וואלן. די שארפע רייד זענען געקומען דינסטאג, בעת א באזוך אין די חרדי'שע מוסדות התורה אין רחובות.


ווען מ'האט אים געפרעגט איבער נתניהו און די פאליטישע בלאקן וואס קענען נאכפאלגן די וואלן, האט גפני געזאגט אז ער איז מער נישט גרייט צו מאכן דעם זעלבן צוזאג וואס ער האט געמאכט אין די פארגאנגענע קאמפיינס אז זיין פארטיי וועט גיין מיט נתניהו. ער האט צוגעגעבן מיט א שטעך: "איך ווייס שוין נישט אין וועלכע פארטיי נתניהו געפינט זיך."


דער וועטעראן דגל התורה פירער האט אויך גענומען אויפן צימבל די ש"ס פארטיי דורכאויס זיין באזוך. רעדנדיג איבער די פאליטישע קאנקורענץ פאר חרדי'שע שטימען, האט גפני דעקלערט אז זיין לאגער איז "די מערסטע חרדי'ש" און ער האט אויסגעדרוקט קאנפידענץ אז זיי ווערן שטערקער אין די אנקעטעס.


גפני'ס ווערטער קומען אין א צייט וואס די חרדי'שע פארטייען אין ארץ ישראל גייען אדורך א קאמפליצירטע תקופה מיט נתניהו און דעם ברייטערן רעכטן בלאק, נאך די לאנגע און שווערע קאמפן ארום דעם חוק גיוס בני ישיבות און רעגירונג פאנדינג פאר חרדי'שע מוסדות.


די בודזשעטן פאר די מוסדות איז אויך געווען א הויפט טעמע ביים באזוך אין רחובות. גפני האט שארף קריטיקירט די רעגירונג באאמטע און די יוסטיץ סיסטעם איבער זייערע שריט קעגן די חרדי'שע חינוך סיסטעם, זאגנדיג אז כאטש "די ביוראקראטן זענען קעגן אונז," בלייבט אבער דער ציבור געטריי צו די חרדי'שע פארטייען.


דער קאנפליקט קומט אינמיטן א ברייטערן קריזיס איבער די בודזשעטן פאר חרדי'שע מוסדות. אנהייב חודש האט די כנסת פינאנץ קאמיטעט באשטעטיגט בערך 270 מיליאן שקל אין פרישע פאנדן פאר חרדי'שע חינוך, אבער דער הויפט געריכט (בג"ץ) האט שפעטער פארפרוירן די קאנטראווערסיאלע געלטער ביז א ווייטערדיגע פארהער. באזונדער האט די אטוירני דזשענעראל (יועמ"ש) געדרוקט פאר שטרענגערע תנאים וואס זאלן בינדן די ווייטערדיגע פאנדינג פאר חרדי'שע מוסדות צו די פאדערונגען פון לערנען לימודי חול און אונטערליגן צו רעגירונג איבערזיכט.


דורכאויס זיין באזוך אין רחובות, האט גפני באזוכט עטליכע מוסדות התורה, אריינגערעכנט תלמוד תורה 'הבאר', א ישיבה קטנה, די 'מעלות שמחה' סעמינאר, און א נייע חרדי'שע לייברערי וואס ווערט יעצט געבויט דורך די שטאט.


דער באזוך קומט אין א צייט וואס דגל התורה רוקט זיך טיפער אריין אין אן עלעקשאן מאוד, ווען די פראגע איבער די צוקונפטיגע פאליטישע אליאנצן פון די חרדי'שע פארטייען - און בפרט צי זיי וועלן נאכאמאל שטיצן נתניהו - ווערט א הויפט אישו בעפאר די קומענדיגע וואלן.