ווילדע האליוואוד-סטייל רויבעריי אין עגיפטן ענדיגט זיך מיט א בלוטיגע שיסעריי נאכן גנב'ענען פלייש פון א פארנדיגע טראק


וואס האט זיך אנגעהויבן ווי א מאדנע, כמעט אומגלויבליכע רויבעריי אויף א הייוועי אין עגיפטן, האט זיך געענדיגט מיט אן ערנסטע בלוט-פארגיסונג. א באנדע פון זעקס פארברעכער האבן באוויזן צו גנב'ענען 105 קילאגראם פון פארפרוירענע טשיקן פון א טראק אינמיטן פארן, אבער זענען שפעטער אויפגעכאפט געווארן דורך די פאליציי אין א פייער-אויסטויש וואס האט איבערגעלאזט דריי פון זיי טויט.


די דראמאטישע גניבה איז פארגעקומען דעם 25'סטן אוגוסט אויף די קיירא-איסמעיליע דעזערט ראוד, ווען די באנדע האט גענוצט א פיקאפ טראק זיך צו דערנענטערן צו א ריפרידזשערעיטעד טראק וואס האט טראנספארטירט ארום פיר טאן פלייש. לויט ווי מען זעהט אויף ווידעאו רעקארדירונגען און עדות זאגן, איז איינער פון די פארברעכער ארויפגעקראכן אויפ'ן דאך פונעם קאר בעת ביידע טראקס זענען געפארן אויף א הויכע ספיד אויפ'ן הייוועי, און האט אויפגעבראכן די אונטערשטע טירן פונעם טראק צו אריבערגעבן באקסעס מיט פארפרוירענע טשיקן פאר זיינע חברים אינעם פיקאפ טראק. די גאנצע אפעראציע איז דורכגעפירט געווארן אן דעם וואס דער טראק דרייווער זאל בכלל באמערקן אז עפעס טוט זיך אונטער זיין רוקן.


די גניבה איז נאר ארויפגעשווימען אויבערפלאך נאכדעם וואס א דורכפארער האט אפגעכאפט די ווילדע סצענע אויף ווידעאו און עס איז געווארן וויירעל אויף סאשעל מידיע, וואו מענטשן האבן עס צוגעגליכן צו אן עקשאן מאווי. עס איז געווען ערשט נאכדעם וואס די ווידעאו האט אנגעהויבן צירקולירן, אז די טראקינג קאמפאני האט זיך געכאפט אז עס פעלט פלייש, וויבאלד דער דרייווער האט ווייטער פארגעזעצט זיין וועג אן קיין אנונג וואס עס האט זיך אפגעשפילט. פון די פיר טאן פלייש, האבן די גנבים באוויזן צו אנטלויפן מיט ארום 105 קילאגראם. די פונקטליכקייט און דרייסטקייט פון די גניבה, דורכגעפירט אויף א הייוועי ספיד, איז געווארן דער הויפט שמועס איבער'ן ראיאן.


די עגיפטישע אויטאריטעטן האבן נישט פארלוירן קיין צייט און האבן שנעל אידענטיפיצירט די פארדעכטיגטע, וועלכע האבן געהאט א רייכע קרימינאלע היסטאריע פון באוואפנטע רויבערייען און דראגס. אינוועסטיגעיטארס האבן נאכגעספורט די באנדע צו זייערע באהעלטענישן אין קיירא און אינעם דערנעבנדיגן קאליאוביא פראווינץ, און האבן אונטערגענומען אן אפעראציע זיי צו ארעסטירן. לויט די עגיפטישע אינערן-מיניסטעריום, האט די קאנפראנטאציע זיך שנעל פארוואנדלט אין א געוואלדטאטן, ווען די סוספעקטס האבן געעפנט פייער אויף די אפיצירן, וואס האט געפירט צו א העפטיגע שיסעריי. ביים ענדע זענען דריי פון די זעקס באנדע מיטגלידער געהרגעט געווארן, און די איבעריגע דריי זענען ארעסטירט געווארן און שטייען יעצט אויס קלאגעס פון באוואפנטע רויבעריי און שיסן אויף פאליציי.


אין די נאכווייען פון די שיסעריי, האט די פאליציי קאנפיסקירט דעם פיקאפ טראק וואס איז גענוצט געווארן פאר די גניבה, עטליכע וואפנס אריינגערעכנט אטאמאטישע רייפלס און א שאטגאן, און כאטש א טייל פון די געגנב'עטע טשיקן. באאמטע זאגן אז די קעיס ברענגט ארויס ערנסטע זארגן, וויבאלד פוד-סעיפטי עקספערטן ווארענען אז דאס אויפברעכן א ריפרידזשערעיטעד טראק, אפילו פאר א קורצע צייט, קען שטערן די טעמפעראטור קאנטראל וואס פעלט זיך אויס צו האלטן די פלייש זיכער פאר קאנסומאציע. וואס האט זיך אנגעהויבן ווי א מאדנע וויירעל ווידעאו, האט זיך ענדגילטיג אויסגעשטעלט צו זיין אן ערנסטע קרימינאלע קעיס, וואו די אויטאריטעטן באהאנדלען דעם אינצידענט ווי א געפארפולע באוואפנטע רויבעריי און נישט בלויז א פשוט'ע גניבה.