שארפע עסקאלאציע: אמעריקע פירט דורכפאלנדיגע באמבארדירונגען אין איראן; טעהראן ענטפערט מיט מיסילס אויף אמעריקאנער באזעס אינעם ראיאן

די איראנער 'רעוואלוציאנערע גווארדיע' (IRGC) האט באשטעטיגט אז פיר מיטגלידער פון איר עראָספּעיס אפטיילונג זענען אומגעקומען איבערנאכט, נאכדעם וואס אמעריקאנער קרעפטן האבן באמבארדירט א ציל אין די קערמאנשאַה פראווינץ. דער ראיאן, וואס געפינט זיך אין די בערגיגע טיילן פון מערב איראן, איז שוין לאנג באקאנט אלס איינע פון די וויכטיגסטע צענטערן פאר איראנער באליסטישע מיסילס.

אין א סטעיטמענט וואס איז פארעפנטליכט געווארן דורך די האלב-אפיציעלע 'פארס' נייעס אגענטור, זענען די פיר אומגעקומענע אידענטיפיצירט געווארן אלס רעזא מאכאמאדי, שאהראם דזשאפארי, אלירעזא שאקיבא, און דזשאפאר קאהריזי, וועלכע זענען לויט זיי "געפאלן אויף קידוש השם" דורך די אמעריקאנער רעזשים.

אומקלאסיפיצירטע ווידעא קליפס פון די אטאקע צייגן ווי א טראק וואס טראגט א מיסיל לאנטשער ווערט פארניכטעט, נאכגעפאלגט מיט א רייע מאסיווע אויפרייסן, וואס צייגט אז די באמבעס האבן געטראפן אן ארט וואו עס זענען געווען אנגעפילט וואפנס אדער ברענשטאף. קערמאנשאַה איז שוין עטליכע מאל געצילט געווארן אין די אנגייענדע לופט קאמפיין קעגן איראן, צוליב איר ראלע אלס א הויפט באזע פאר די מאביל מיסיל סיסטעמען וואס איראן נוצט צו אטאקירן מדינת ישראל און אמעריקאנער פאזיציעס אינעם מיטל מזרח.

ברייטערע כוואליע פון אטאקעס

די אטאקע אין קערמאנשאַה איז אבער נישט געווען קיין איינצלנע אינצידענט. עס איז געקומען אלס א טייל פון א ברייטערע כוואליע פון אמעריקאנער אטאקעס, אין וועלכע עס זענען אויך אומגעקומען דריי מיטגלידער פון די איראנער 'באסידזש' פאראמיליטערישע גרופע אויפן לאוואן אינזל - אן אינזל ביים דרום בארטן פון איראן וואס פראדוצירט ענערגיע. ווי אויך זענען באריכטעט געווארן פרישע פאטאליטעטן אין די כוזעסטאן פראווינץ.

אינאיינעם, זאגן איראנער באאמטע, איז די צאל טויטע פון די לעצטע 24 שטונדן פון אמעריקאנער אטאקעס איבערן לאנד געשטיגן צו מינימום 18, אריינגערעכנט מיליטערישע פערסאנאל און ציווילע בירגער וואס זענען געכאפט געווארן אינמיטן די פייער.

אין א באזונדערע אינצידענט האבן איראנער אויטאריטעטן באריכטעט אז אן אטאקע אויף א חתונה צערעמאניע אין די סיריק דיסטריקט פון די הארמאזגאן פראווינץ האט פארוואונדעט ארום 70 ציווילע און אומגעברענגט נאך עטליכע. טעהראן האט שארף פארדאמט דעם אינצידענט, כאטש אמעריקאנער באאמטע האלטן זיך ביי זייערס אז זייערע צילן זענען געווען דירעקטירט בלויז אויף די מיליטערישע אינפראסטרוקטור פון די רעוואלוציאנערע גווארדיע.

איראנער נקמה און ראיאנישע אנגעצויגנקייט

די יעצטיגע אויפטרייסלונג איז איינע פון די שווערסטע עסקאלאציעס אין די לעצטע וואכן צווישן וואשינגטאן און טעהראן. עס קומט נאכדעם וואס פרעזידענט טראמפ האט באשולדיגט איראן אין פארלעצן א פריערדיגע פייער-אפשטעל אפמאך, און האט פארארדנט א פרישע רונדע פון אטאקעס אלס רעאקציע.

איראן איז אבער נישט געבליבן שטיל. אלס נקמה האבן איראנער קרעפטן ארויסגעשאסן א באראזש פון מיסילס און דראונס קעגן אמעריקאנער מיליטערישע פאזיציעס און אליאירטע טעריטאריעס אינעם ראיאן, צילנדיג ירדן, קואוועיט און באכריין. לופט-פארטיידיגונג סירענעס האבן זיך צעפיפן אין עטליכע שטעט אינעם גאלף ראיאן, בעת די לענדער האבן זיך געגרייט פאר א מעגליכע ווייטערדיגע עסקאלאציע.

ירדן האט באריכטעט א שווערע באליסטישע מיסיל אטאקע קעגן 'קעמפ טיטין', בעת קואוועיט און באכריין האבן ביידע באריכטעט דראון און מיסיל אקטיוויטעטן געצילט צו שטערן אמעריקאנער אפעראציעס אין די געגנט. ראיאנישע מאכטן, אריינגערעכנט סאודי אראביע און קאטאר, האבן זיך געאיילט צו פארדאמען איראן'ס נקמה אטאקעס אלס א פארלעצונג פון סואווערעניטעט און אינטערנאציאנאלע געזעץ.

די היסטאריע פון קערמאנשאַה

די וויכטיגקייט פון קערמאנשאַה אין דעם קאנפליקט גייט צוריק נאך אסאך פאר די יעצטיגע אטאקע. די פראווינץ פארמאגט א שטארק-באוואכטע אונטערערדישע מיסיל איינריכטונג וואס איז שוין געווארן באמבארדירט און טיילווייז חרוב געווארן ביי די פריערדיגע 'צוועלף-טאג מלחמה', אן אטאקע וואס האט איינגעווארפן עטליכע אריינגענג און געשעדיגט עטליכע מיסיל-סטארידזש געביידעס.

דאס וואס די אמעריקאנער און אליאירטע קרעפטן קערן זיך כסדר צוריק צו באמבארדירן דעם ראיאן, צייגט ווי צענטראל די מיסיל אינפראסטרוקטור דארט איז פאר איראן'ס מיליטערישע קראפט. יעצט, ווען ביידע זייטן טוישן זיך מיט אטאקעס אויף עטליכע פראנטן אויפאמאל - פון איראן'ס מערב פראווינצן ביז אמעריקאנער באזעס איבערן גאלף - זעט נישט אויס ווי די יעצטיגע עסקאלאציע גייט זיך אפשטעלן אין די נאענטע צוקונפט.