היסטארישע רעדוקציע: פרייזן פון פרעסקריפשאן מעדיצינען פאלן צום נידריגסטן שטאפל אין איבער 60 יאר

פרייזן פון פרעסקריפשאן דראגס אין די פאראייניגטע שטאטן האבן יעצט פארצייכנט זייער שארפסטן יערליכן פאל אין מער ווי זעקס יארצענדלינגען, פאלנדיג מיט 3.1 פראצענט אין די צוועלף מאנאטן וואס האבן זיך געענדיגט אין יולי. לויט די דאטא פון די 'ביורא אוו לעיבאר סטאטיסטיקס' (BLS), איז דאס דער שארפסטער יערליכער פאל זינט מערץ 1963.

אין חודש יולי אליינס זענען די פרייזן געפאלן מיט 0.8 פראצענט, וואס צייכנט אפ דעם דריטן נאכאנאנדיגן חודש פון א רעדוקציע. פאקטיש האבן די פרייזן פון פרעסקריפשאן מעדיצינען נישט געזען קיין איין חודשליכע העכערונג דורכאויס דעם גאנצן יאר 2026. די רעדוקציע קומט אין א צייט וואס אנדערע טיילן פון די העלט קעיר סיסטעם זענען ווייטער געשטיגן, ווי שפיטאל סערוויסעס וואס זענען ארויף מיט 5.2 פראצענט און דאקטוירים סערוויסעס מיט 2.4 פראצענט אין די זעלבע צייט אפשניט. דאס איז א דראסטישע טויש נאך צענדליגע יארן וואס אמעריקאנער דראג פרייזן זענען כסדר געשטיגן פיל שנעלער ווי אין רוב אנדערע אנטוויקלטע לענדער.

די טראמפ אדמיניסטראציע האט נישט פארלוירן קיין צייט און גלייך גענומען קרעדיט פאר די פאזיטיווע ציפערן. זיי האבן אנגעוויזן אויף זייער "מאוסט פעיוארד נעישאן" (Most Favored Nation) פרייזן סטראטעגיע - וואס פארבינדט אמעריקאנער דראג פרייזן צו די נידריגערע פרייזן וואס אנדערע לענדער צאלן - אלס דער הויפט קראפט אונטער דעם פאל. דאס ווייסע הויז גיט איבער אז צווישן 17 און 26 פון די וועלט'ס גרעסטע דראג פירמעס, וואס דעקן ארום 86 ביז 89 פראצענט פונעם מארקעט, האבן שוין אונטערגעשריבן די נייע פרייזן אגרימענטס.

באאמטע גיבן אויך קרעדיט פאר די נייע "טראמפ-אר-עקס" (TrumpRx) פלאטפארמע, וואס לויט די אדמיניסטראציע האט עס שוין געברענגט ארום 700 מיליאן דאלאר אין שפארונגען פאר פאציענטן. צווישן אנדערע זענען די טייערע GLP-1 דראגס, וואס פלעגן קאסטן איבער 1,000 דאלאר א חודש, געפאלן צו אנהייבן ביי בלויז 149 דאלאר, און אנדערע טייערע מעדיצינען ווי אינסולין און אינהעילערס זענען געפאלן צווישן 50 און 90 פראצענט.

אבער נישט יעדער איז איינשטימיג אז די בילד איז אזוי פשוט. עקספערטן און זעלבסטשטענדיגע אנאליסטן ווארענען אז די BLS אינדעקס טרעקט נישט די אפיציעלע פרייזן וואס די דראג פירמעס בעטן, נאר ענדערש וואס די פארמאסיס באקומען אריין נאכן רעכענען אינשורענס, ריבעיטס און דיסקאונטס. דאס מיינט אז א נידריגערע ציפער באדייט נישט דוקא אז די פאבריצירער אליינס האבן געשניטן די פרייזן.

טייל ריסערטשערס ווייזן אן אויף א געזעץ פון די ביידען עפאכע וואס ערלויבט מעדיקעיר דירעקט צו פארהאנדלען פרייזן אויף געוויסע טייערע דראגס אלס א מער ווארשיינליכע אורזאך פאר די יעצטיגע רעדוקציע. ווי אויך שפילט א גרויסע ראלע די קאמפעטישן פון דזשענעריק מעדיצינען וואס קומען אריין אינעם מארקעט ווען די פאטענטן פון די ארגינעלע ברענדס לויפן אפ. איין עקספערט איז אפילו געגאנגען אזוי ווייט ווי צו זאגן אז די נייע פרייזן אגרימענטס פון די טראמפ אדמיניסטראציע האבן בכלל נישט געקענט אפעקטירן די יולי ציפערן, וויבאלד די פראגראמען זענען נאך אפילו נישט אריין אין קראפט ווען די דאטא איז געווארן געזאמלט.

אויף וואס ביידע זייטן זענען יא מסכים איז, אז דער טרענד אליינס איז א פאקט און א גאר וויכטיגע אנטוויקלונג, אפילו אויב מען קריגט זיך ווער עס קומט זיך די קרעדיט. פרייזן פון פרעסקריפשאן דראגס זענען דראסטיש געשטיגן אין די לעצטע פערציג יאר, לויפנדיג ארום דריי מאל שנעלער ווי די אלגעמיינע אינפלאציע זינט 1985. א פולשטענדיגע רעדוקציע פון אזא פארנעם איז א גרויסע זאך, אומאפהענגיג פון וועלכע פאליסי עס האט עס געברענגט.

די אדמיניסטראציע לייגט עס אראפ אלס א קלארע באווייז אז זייער אגרעסיווע פארהאנדלונגען מיט די גרויסע פארמאסוטיקעל פירמעס צאלט זיך ענדליך אויס פאר די קאנסומערס. פון די אנדערע זייט בעטן די זעלבסטשטענדיגע ריסערטשערס צו ווארטן מיט די פרייד און נעמען אין אכט אנדערע פאקטארן בעפאר מען פראקלאמירט א פולשטענדיגע זיג. ווי נאר מער פון די נייע אגרימענטס וועלן אריינגיין אין פולן קראפט אין די קומענדיגע מאנאטן, וועלן די פרישע דאטא ציפערן געבן א קלארערע בילד פונקטליך וויפיל קרעדיט די טראמפ אדמיניסטראציע קען עכט נעמען פאר זיך.