בס"ד

איראן אין א נייע ראלע: טרעט ארויס אלס "שלום מאכער" אינעם מיטל מזרח און שליסט אפמאך מיט אמאן

אין אן אומערווארטעטע שריט, האט איראן אנגעהויבן שפילן די ראלע פון א ראיאנישע "שלום מאכער" אויף צוויי פראנטן, לויט ווי עס גיט איבער דער איראנער אויסערן מיניסטעריום ווארטזאגער, איסמעיל באגאי. טעהראן האט געפאדערט פון סאודי אראביע און תימן זיך צו האלטן צו זייער יעצטיגע "ראוד מעפ" צו לעזן זייער לאנג-פארצויגענע קאנפליקט, כאטש זיי האבן קלארגעשטעלט אז איראן האט נישט געהאט קיין שום טייל אין אויסארבעטן דעם פלאן.

דער ווארטזאגער איז געגאנגען א שריט ווייטער, טענה'נדיג אז דאס קעסיידערדיגע געשלעג צווישן מוסולמענישע לענדער דינט בלויז איין געווינער — מדינת ישראל. ער האט באשולדיגט אז מדינת ישראל לעבט אויף די שטענדיגע אנגעצויגנקייט איבערן גאנצן מיטל מזרח. די קאמענטארן צייגן א דראסטישע טויש אין טאן, ספעציעל אין א צייט וואס דער גאנצער ראיאן איז פארמישט אין א טיפע קאנפליקט.

אין א פאראלעלע שריט, האט באגאי באשטעטיגט אז איראן און אמאן האבן ענדגילטיג אויסגעארבעט אן אפמאך פאר א צייטווייליגע זיכערע רוטע דורכ'ן 'הארמוז דורכגאס'. די פונקטליכע דעטאלן איבער ווען און ווי אזוי דאס וועט אפיציעל געמאלדן ווערן, ווערן נאך יעצט אויסגעארבעט.

די דאפלטע שריט פון איראן — צו שטופן פאר א רואיגקייט צווישן ריאד און סאנא, אינאיינעם מיט'ן פארזיכערן א ים-רוטע — ברענגט ארויף גלייך פראגעס איבער איראן'ס ברייטערע סטראטעגיע. עס בלייבט צו זען צי דער הארמוז אפמאך וועט זיך האלטן אונטער דרוק, און ווי ערנסט אנדערע לענדער אינעם ראיאן וועלן נעמען טעהראן'ס נייע רופן פאר רואיגקייט.