בס"ד

 

קראון הייטס. – א פארשטארקטע אנוועזנהייט פון די ניו יארקער פאליציי (NYPD) איז שטארק קענטיג ארום דעם צענטראלן חב"ד הויפטקווארטיר אויף 770 איסטערן פארקוועי און איבער די גאנצע קראון הייטס געגנט, אין צייט וואס א ריזיגע צאל חב"ד חסידים און געסט פון איבער דער גאנצער וועלט קומען צו פארברענגען דעם חודש תשרי אין די געגנט.


 

א ווידעא וואס צירקולירט פון די געגנט צייגט א פאליציי אפיציר סטאנציאנירט נעבן א פאליציי קאר הארט נעבן 770, אלס טייל פון די געהעכערטע זיכערהייט מאסנאמען פאר די ימים טובים. די פארמערטע פאליצייאישע אנוועזנהייט איז א טייל פון א ברייטערע זיכערהייט אפעראציע אין קראון הייטס דורכאויס ראש השנה און די קומענדיגע ימים טובים פון חודש תשרי. אפיצירן ווערן סטאנציאנירט נעבן בתי מדרשים און ביי די הויפט גאסן וואס זענען פיל מיט אידן, אריינגערעכנט קינגסטאן און אלבאני עוועניוס, און פרישע פאטראלן זענען געפלאנט איבער די גאנצע געגנט.


 

די זיכערהייט שריט קומען אין א צייט וואס קראון הייטס נעמט אויף א ריזיגע צאל באזוכער אויף חודש תשרי. ווי 'א בליק' האט שוין פריער באריכטעט, האבן זיך ריזיגע מאסן מענטשן פארזאמלט אויף שחרית אין 770 קורץ פאר ראש השנה.


 

אין די זעלבע צייט האט די פאליציי דעפארטמענט געהעכערט די זיכערהייט איבער די גאנצע שטאט פאר די הייליגע טעג. פאליציי קאמישינער דזשעסיקא טיש האט געמאלדן אז די פאליציי אנוועזנהייט ביי שולן, ישיבות און אידישע צענטערן וועט זיין פיל גרעסער דאס יאר. פאליציי באאמטע האבן אבער קלארגעשטעלט אז עס איז נישט דא קיין שום ספעציפישע אדער קראנטע סטראשע, נאר עס איז בלויז א טייל פון די פארזיכטיגקייט מאסנאמען צו באשיצן די קאמיוניטי.