מיט א געוואלדיגע פרייד, געמישט מיט טרערן פון התרגשות און הודאה צום באשעפער, נעמט די אידישע וועלט אויף די פריידיגע און אומגלויבליכע בשורה טובה פון איראק: נאך 11 לאנגע און ביטערע יארן פון שמאכטן אונטער שווערע אומשטאנדן אין א טורמע אינעם קורדיסטאן ראיאן, איז הבחור בנימין (בן לימור) כאסין ענדליך באפרייט געווארן צו גיין לחירות.

דער מאמענט פון זיין באפרייאונג האט אנגעפילט מיט עמאציעס יעדן וואס האט עס מיטגעהאלטן, ספעציעל ווען דער באפרייטער בנימין האט מיט פארוויינטע אויגן פונעם גרויסן התרגשות געמאכט דעם ברכה "שהחיינו וקיימנו והגיענו לזמן הזה", דאנקענדיג דעם באשעפער אויף זיין ישועה נאך אזויפיל יארן פון פיין.

די קאמפליצירטע געשיכטע פון בנימין'ס ארעסט ציט זיך צוריק צו עטליכע יאר צוריק בעת די שווערע שלאכטן אינעם מיטל-מזרח ראיאן. הבחור בנימין האט זיך ארגינעל אנגעשלאסן אין די קורדישע מיליטערישע קרעפטן מיט א ציל צו קעמפן קעגן די ברוטאלע 'אייסיס' (ISIS) טעראר גרופע וואס האט דעמאלט אנגעווארפן א פחד איבער די גאנצע וועלט.

דורכאויס א פייער געפעכט אינעם קריג, האט פאסירט אן אומגליק ווען אן ארטיגער אראבער איז אומגעקומען דורך זיינע הענט. אלס רעזולטאט פון דעם אינצידענט איז בנימין ארעסטירט געווארן דורך די לאקאלע קורדישע מאכטן אינעם איראקער טעריטאריע, און נאך א פראצעס איז ער ל"ע פאראורטיילט געווארן צום שרעקליכן 'טויט אורטייל'. זיין לעבן איז געהאנגען אויף א האר, און די האפענונגען זענען געווען גאר קליין.

הערנדיג פון דעם ביטערן פסק דין, האבן זיך א גרופע געטרייע היימישע עסקנים און פראפעסיאנאלע אדוואקאטן אריינגעווארפן אין די קאמפליצירטע ארבעט פון 'פדיון שבויים' צו ראטעווען א אידיש לעבן פון טויט.

פאריאר האבן די אדוואקאטן און עסקנים, נאך שווערע פארהאנדלונגען, באוויזן צו דערגרייכן אן אראבישן "סולכא" פראצעדור (א טראדיציאנעלער פראצעדור פון שלום מאכן און פארגיטיגונג).

אין די ראמען פון דעם "סולכא", האבן די עסקנים צוזאמגעשטעלט און באצאלט אן אסטראנאמישע סומע פון א פערטל מיליאן דאלאר ($250,000) פאר די פאמיליע פונעם אומגעקומענעם אראבער.

אדאנק דעם געלט-אפמאך, איז געלונגען צו אינגאנצן אנולירן דעם שרעקליכן טויט אורטייל וואס האט איבער אים געשוועבט, וואס האט געפירט צו זיין ענדגילטיגע באפרייאונג די יעצטיגע טעג.

נאכן ארויסגיין לחירות און כאפן דעם ערשטן אטעם פון פרייהייט פונעם איראקער טורמע, האט דער הויפט אדוואקאט אין דעם קעיס, מר. אלען לאווי, איבערגעגעבן אן עפנטליכן דאנק אין נאמען פון בנימין פאר די היימישע עסקנים וואס האבן אימערמידליך געארבעט אונטער די קוליסן. ער האט ספעציפיש ארויסגעברענגט די העראישע און אימערמידליכע ארבעט פון די עסקני מערכת:

העסקן הערשי גאטדינער

העסקן שמעון ראלניצקי

דער פילאנטראפ און ביזנעסמאן מאיר צבי טויבער

דער חשוב'ער דיין הגאון רבי חיד"א ווייס שליט"א

מיט די פולקאמע פאפירן אין די הענט, האלט זיך בנימין אצינד אינמיטן די לעצט-מינוטיגע צוגרייטונגען זיך ארויסצולאזן אויפ'ן וועג קיין ארץ ישראל. לויט ווי עס גיט איבער דער אדוואקאט אלען לאווי, איז דער פלאן אז ער זאל שוין קענען אנקומען אהיים נאך בעפארן קומענדיגן שבת קודש.

אין ארץ ישראל ווארטן שוין אויף אים מיט אומבאשרייבליכע בענקעניש זיינע נאנטע פאמיליע מיטגלידער, וועלכע האבן נישט געזען זייער זון און ברודער פאר איבער 11 יאר, אפווארטנדיג אויף דעם פריידיגן מאמענט פון צוריק פאראייניגט ווערן אונטער איין דאך. הודו לה' כי טוב כי לעולם חסדו!