בס"ד

היסטארישע טויש ביי 'בערקשייר העטעוועי': ווארען באפעט טרעט אפ אלס טשערמאן נאך איבער א האלבן יארהונדערט

דער 96-יעריגער וועלט-בארימטער אינוועסטאר ווארען באפעט, האט געמאלדן אז ער טרעט אפ פון זיין פאזיציע אלס טשערמאן פון די מעכטיגע 'בערקשייר העטעוועי' פירמע, א פאזיציע וואס ער האט אנגעהאלטן זינט יאר 1970. די רעזיגנאציע גייט אריין אין קראפט תיכף ומיד.

באפעט, וועלכער איז באקאנט אין די ביזנעס וועלט אלס דער "אראקל פון אמאכא", וועט ווייטער פארבלייבן אויפ'ן באורד אוו דירעקטארס אלס אן עמערעטוס טשערמאן. זיין פלאץ וועט איבערנעמען זיין זון, האוערד באפעט, וועלכער זיצט שוין אויפ'ן באורד זינט 1993 און פירט אן אייגענע פילאנטראפישע פאונדעישאן. די שריט קומט אלס טייל פון א לאנג-פלאנירטע סוקסעסיע פלאן ווער עס זאל איבערנעמען די פירערשאפט.

אין א בריוו צו די שערהאלדערס, האט באפעט געשריבן מיט א נאסטאלגישן טאן אז "דער זייגער געווינט שטענדיג", אבער ער האט אויסגעדרוקט פולע קאנפידענץ אז די פירמע איז אין גוטע הענט און איז גרייט פאר אלעס וואס קומט אין די צוקונפט.

די יעצטיגע שריט איז די לעצטע פאזע אין א לאנגזאמע און גוט-אויסגערעכנטע פירערשאפט טויש. פאראיאר האט באפעט אפגעטרעטן פון די סי-אי-או (CEO) פאזיציע, איבערגעבנדיג די טעגליכע אפעראציעס פאר דעם לאנגיעריגן עקזעקיוטיוו גרעג עיבל, אבער ער איז דעמאלט נאך געבליבן אלס טשערמאן. יעצט אז זיין זון האוערד נעמט איבער דעם טשערמאן אמט, איז די נייע פירערשאפט סטרוקטור קאמפליט: עיבל פירט די טעגליכע ביזנעס, האוערד וועט היטן אויף די קולטור און ווערטן וואס זיין טאטע האט געבויט פאר זעקס יארצענדלינגען, און ווארען אליינס רוקט זיך אין א זייט אלס אן עלטערע שערהאלדער און ראטגעבער.

באפעט האט ארגינעל אויפגעבויט 'בערקשייר העטעוועי' פון א דורכגעפאלענע טעקסטיל פאבריק צו איינע פון די גרעסטע קאנגלאמעראטן אין די וועלט. אפילו אין זיינע לעצטע יארן ביים שפיץ פון די פירמע איז ער געבליבן אן אקטיווער אינוועסטאר, און האט נאך אנהייב יאר געפירט די פירמע צו קויפן א מולטי-ביליאן דאלארדיגע אקציע אין די 'אלפאבעט' קאמפאני.