בס"ד

טראמפ רייסט שארף אראפ דעם נייעם בריטישן פרעמיער מיניסטער איבער זיין אימיגראציע פאליסי

פרעזידענט טראמפ האט זיך געטראפן מיט'ן נייעם בריטישן פרעמיער מיניסטער ענדי בוירנהעם, און די אימיגראציע קריזיס איז שנעל געווארן דער הויפט טעמע פונעם שמועס. טראמפ האט שפעטער באשטעטיגט אז די צוויי פירער האבן דירעקט גערעדט איבער דעם אישו, אבער ער האט זיך בכלל נישט צוריקגעהאלטן פון זאגן זיין שארפע מיינונג איבער ווי אזוי בוירנהעם האנדלט עס.

מיט גאר שארפע ווערטער האט טראמפ געזאגט אז מען דארף בוירנהעם ממש צורייסן פאר'ן ווייטער ערלויבן וואס ער האט אנגערופן א "דריטע וועלט אינוואזיע" אין ענגלאנד. טראמפ האט טענה'ט אז די פירערשאפט פונעם לאנד לאזט דעם קריזיס ארויסגיין פון קאנטראל אן קיין שום אפהאלט. ער איז געגאנגען נאך ווייטער, באשולדיגנדיג די בוירנהעם גאווערנמענט אז זיי באהאנדלען די פשוט'ע בריטישע בירגער ווי "צווייטע קלאס בירגער" אין זייער אייגן לאנד. דאס איז א קלאגע וואס פאלט פונקט אריין אינמיטן די שוין-אנגעצויגענע נאציאנאלע דעבאטע אין ענגלאנד איבער די גרעניצן.

די קאמענטארן קומען בלויז עטליכע מאנאטן נאכדעם וואס בוירנהעם האט איבערגענומען דעם פרעמיער מיניסטער אמט אין יולי, ווען ער האט איבערגענומען קיר סטארמער נאך א שנעלע טויש אין די פירערשאפט פון די לעיבאר פארטיי. אריינקומענדיג אין אפיס האט בוירנהעם צוגעזאגט א דראסטישע טויש פאר'ן לאנד, מיט א נייע פאליטישע און עקאנאמישע מאדעל, אינאיינעם מיט א ברייטערע צען-יאר פלאן פאר ענגלאנד.

אבער אימיגראציע בלייבט איינע פון די מערסט סענסיטיווע און ברענענדיגע אישוס אויף זיין טיש. טראמפ'ס שארפע פובליק קריטיק צייגט אז דאס וועט ווארשיינליך בלייבן א שטענדיגע רייבונג-פונקט צווישן וואשינגטאן און לאנדאן. בשעת בוירנהעם פרובירט נאך צו טרעפן זיין פלאץ אויף די וועלטליכע ארענע, לייגט אזא סארט דירעקטע קריטיק פון אן אמעריקאנער פרעזידענט ארויף פרישע פרעשור אויף אים, אין א צייט וואס ער מוטשעט זיך שוין סייווי אינדערהיים מיט די שווערע מצב.