בעלוויל, אנטעריא. — דער 29-יעריגער באוואפנטער מאן וועלכער איז געווען פארמישט אין א שיסעריי אינדרויסן פון די 'סאנס אוו דזשעיקאב' שול אין בעלוויל, איז געשטארבן פון זיינע וואונדן, לויט ווי די ארטיגע אויטאריטעטן האבן געמאלדן.


דער שרעקעדיגער אינצידענט האט זיך אפגעשפילט זונטאג צונאכטס, פונקט אין די צייט וואס די לאקאלע אידישע קאמיוניטי איז געווען פארזאמלט אין שול צו די הייליגע יום כיפור תפילות.


לויט די אנטעריא ספעציעלע אינוועסטיגעישאן יוניט, איז א בעלוויל פאליציי אפיציר געווען סטאנציאנירט נעבן די שול ווען עס האט אויסגעבראכן א שיסעריי מיט א מאן וואס איז געווען באוואפנט מיט א שאטגאן. א צווייטער פאליציי אפיציר איז אנגעקומען אויפן סצענע און האט אויך געעפנט פייער אויפן פארדעכטיגטן.


ביידע, סיי דער שיסער און סיי איינער פון די פאליציי אפיצירן, זענען געטראפן געווארן פון די קוילן און זענען אריינגעפירט געווארן אין שפיטאל. דער 29-יעריגער שיסער איז געשטארבן פון זיינע וואונדן מאנטאג ביינאכט, בשעת דער פארוואונדעטער פאליציאנט געפינט זיך נאך אין שפיטאל אין א קריטישן אבער סטאביליזירטן צושטאנד.


אין די צייט פון די שיסעריי זענען געווען ארום צוויי צענדליג אידן אינעווייניג אין שול, און ברוך השם קיינער פון די מתפללים זענען נישט געשעדיגט געווארן. די פאליציי האט נאכנישט פעסטגעשטעלט א קלארן מאטיוו, און עס איז דערווייל נישט באשטעטיגט געווארן צי די שול אדער די אידישע קאמיוניטי זענען געווען דירעקט געצילט.


די אויספארשונג ארום דעם אינצידענט גייט ווייטער אן.