דראון קעגן דראון: נייע ווידעא צייגט ווי א טערקישע דראון שיסט אראפ א כינעזער דראון אין די סודאן ברודער-קריג


א נייע ווידעא וואס צירקולירט אויפן אינטערנעט צייגט ווי א טערקיש-געמאכטע 'בייראקטאר אקינסי' (Bayraktar Akinci) קאמף-דראון, אפערירט דורך די סודאנעזע מיליטער, טרעקט אפ און רייסט אויף א כינעזער-געמאכטע 'CH-95' דראון וואס ווערט גענוצט דורך די רעוואלטירנדע 'רעפיד סופארט פארסעס' (RSF).


דער 16-סעקונדע אינפרא-רויט קליפ צייגט ווי די קאמערע פונעם דראון לאקט זיך ארויף אויפן ציל און פאלגט אים נאך, ביז די ווידעא האקט זיך איבער פונקט אינעם מאמענט פונעם צוזאמענשטויס, וואס צייגט אויף א סוקסעספולע אטאקע. דער אינצידענט איז לויט באריכטן פארגעקומען העכער די אלגא'א געגנט. ווי ביי רוב בילדער און קליפס וואס קומען ארויס פונעם ברוטאלן ברודער-קריג אין סודאן, קומט עס פון אומאפיציעלע מיליטערישע קוועלער און איז נישט זעלבסטשטענדיג באשטעטיגט געווארן דורך קיין איין זייט. אבער דאס פאלט אריין אין א באקאנטע מוסטער וואס שפילט זיך אפ כסדר זינט יוני, וואו די סודאנעזע מיליטער נוצט זייער פלאטע פון אקינסי דראונס אראפצושיסן א רייע כינעזע דראונס.


וואס מאכט די צוזאמענשטויסן אינטערעסאנט איז די טעכנאלאגישע אונטערשייד צווישן די צוויי. דער אקינסי איז א פארגעשריטענע סטרייק-דראון וואס פליט הויך און קען בלייבן אין די לופטן פאר א לאנגע צייט, וואס גיט אים א קלארע אויבערהאנט. פון די אנדערע זייט איז דער CH-95 א פיל פאמעליכערע דראון וואס פליט נידעריגער און ווערט הויפטזעכטליך גענוצט דורך די רעבעלן פאר שפיאנאזש און קלענערע אטאקעס איבער דארפור און קארדאפאן.


די סודאנעזע מיליטער נוצט כסדר די ראדארן און מיסילס פונעם אקינסי אפצוכאפן די רעבעלן דראונס בעפאר זיי גרייכן די רעגירונג-קאנטראלירטע טעריטאריעס, וואס דאס פארוואנדלט למעשה די הימלען העכער צענטראל סודאן אין א פראנט-ליין צווישן טערקישע און כינעזע טעכנאלאגיע. די נייעסטע אטאקע, אויב באשטעטיגט, איז נאך א באווייז ווי שטארק דראונס שפילן א הויפט ראלע אין דעם קריג וואס האט שוין פארטריבן מיליאנען מענטשן פון זייערע היימען. דערווייל דינט די קליפ אלס נאך א דעטאל אין א קאנפליקט וואו קראנטע פאקטן זענען שווער צו געפינען, אבער די דראון-מלחמה איז פון די איינציגסטע שלאכטן וואס שפילט זיך אפ אפן פארן פובליק.