בס"ד


מדינת ישראל טעכנאלאגיע פירמע שטעלט פאר רעוואלוציאנערע "ראבאטישע קראפט" סיסטעם


די מדינת ישראל טעכנאלאגיע פירמע 'עקסטענד' (XTEND) האט אנטפלעקט איר נייע גרויסארטיגע "ראבאטישע קראפט" קאנצעפט, וועלכע ווערט געטריבן דורך די פירמע'ס אייגענע 'XOS' אפערעיטינג סיסטעם. די נייע פלאטפארמע איז ספעציעל דעזיינט צו פארבינדן א גרופע פון דראונס אין די לופטן אינאיינעם מיט ראבאטישע סיסטעמען אויף דער ערד, און זיי פארוואנדלען אין איין פאראייניגטע קראפט.


מיט די נייע טעכנאלאגיע קען איין איינציגע אפערירער קאנטראלירן קאמפלעצירטע מיסיעס סיי אין די לופטן און סיי אויף דער ערד, אן דעם וואס עס זאל זיין צו שווער אדער קאמפליצירט. אין א ווידעא וואס די פירמע האט ארויסגעשטעלט צו דעמאנסטרירן די סיסטעם, קען מען זען ווי א גרופע דראונס פליען אינאיינעם אין א פונקטליכע פארמאציע איבער אפענע פעלדער און געדיכטע וועלדער, ווי אויך זעט מען ווי זיי קוקן איבער א פארלאזטע געביידע און ארבעטן האנט-ביי-האנט מיט א קליינע ערד-ראבאט צו באגלייטן א קאר.


די בילדער צייגן ארויס די מעגליכקייטן פון די סיסטעם צו ווערן גענוצט פאר שפיאנאזש, אויפפאסונג, און טאקטישע שטיצע אין שווערע אומשטענדן.


די פירמע האט שוין באוויזן צו באקומען גרויסע פארטיידיגונג קאנטראקטן אין די מיטל מזרח, אייראפע, אזיע, און מיטן אמעריקאנער פארטיידיגונגס דעפארטמענט. עקסטענד איז לעצטנס ארויף אויף די 'נאסדאק' בערזע, אין די צייט וואס זי פארברייטערט די XOS סיסטעם צו נאך ערד-פלאטפארמעס, אריינגערעכנט די 'AtlasROVER', וואס ערמעגליכט אטאנאמישע אפעראציעס אונטער מענטשליכע אויפזיכט אין געפארפולע ערטער.


דער ציל פון די פראיעקט איז צו געבן פאר מיליטערישע און זיכערהייט אגענטורן מער פלעקסיביליטעט, דורכ'ן באהאנדלען א געמישטע גרופע פון דראונס און ראבאטן אלס איין איינציגע יוניט, אנשטאט באזונדערע סיסטעמען. עס בלייבט אבער נאך די פראגע ווי אזוי די טעכנאלאגיע וועט זיך אויסארבעטן אונטער עכטע קאמף אומשטענדן און ווי שנעל מען וועט עס קענען אהערשטעלן אויף א גרויסן פארנעם אויף די שלאכטפעלדער. דאס שטעלט אבער ארויס די פירמע אלס א הויפט שפילער אין די שנעל-וואקסנדע פעלד פון אטאנאמישע ראבאטישע מלחמה געצייג.