איראנער אויסערן מיניסטער ווארנט מיט א "דומסדעי מלחמה" נאכדעם וואס טראמפ ווארפט אפ זייער פראפאזאל


דער איראנער אויסערן מיניסטער האט ארויסגעשטעלט איינע פון די שארפסטע ווארענונגען ביז איצט אינעם אנגעצויגענעם קאנפליקט מיט וואשינגטאן. אין אן אינטערוויו אויף די 'ען-בי-סי' פראגראם 'מיט די פרעס' זונטאג, סעפטעמבער 27, האט אבאס אראגטשי געזאגט אז טעהראן איז פולשטענדיג גרייט אז די מלחמה זאל זיך באנייען, אפילו אויב עס וועט זיך אויסלאזן אין א "דומסדעי מלחמה" (ענדע-פון-דער-וועלט קריג).


די שארפע רעאקציע קומט נאכדעם וואס פרעזידענט טראמפ האט עפנטליך אפגעווארפן איראן'ס 7-טאגיגע פראפאזאל צוריק צו עפענען דעם הארמוז דורכגאס, ווי אויך נאך א באריכט אינעם 'וואל סטריט זשורנאל' אז טראמפ קען מעגליך באנייען די באמבארדירונגען נאך די נאוועמבער 'מידטוירם' וואלן. אראגטשי האט אבער אונטערגעשטראכן אז די טיר פאר דיפלאמאטיע איז נאך אלץ אפן, זאגנדיג אז דער באשלוס ליגט יעצט אין די הענט פונעם אמעריקאנער פרעזידענט. ער האט צוגעגעבן אז איראן האט נאך דערווייל נישט באקומען קיין אפיציעלע מעלדונג איבער די אפווארפונג דורך זייערע פארמיטלער.


דער אויסערן מיניסטער האט קלארגעשטעלט די פרייז פאר אן אפמאך: אן ענדע צו די מלחמה, באפרייען די פארפרוירענע איראנער געלטער, אראפנעמען די אמעריקאנער נעיווי בלאקאדע, און די פרייהייט צו פארקויפן איראנער אויל. לויט זיין פלאן, דארף וואשינגטאן נעמען שריט אין די ערשטע פיר אדער פינף טעג, איראן וועט צוריק עפענען דעם דורכגאס אויפן זעקסטן טאג, און פארהאנדלונגען וועלן זיך אנהייבן אויפן זיבעטן טאג.


ער האט אויך חוזק געמאכט פון די אמעריקאנער ערווארטונגען פאר א שנעלע זיג, אנווייזנדיג אז וואשינגטאן האט אמאל ערווארטעט אן אומבאדינגטע אונטערגעבונג אין בלויז עטליכע טעג, בעת די מלחמה - וואס האט זיך אנגעהויבן דעם 28'סטן פעברואר - שלעפט זיך שוין פאר חדשים לאנג אן קיין קלארע רעזולטאטן. איראן, האט ער געזאגט, האט געטוישט אירע טאקטיקן און מאכט זיך בכלל נישט וואוסנדיג פון די אמעריקאנער 'מידטוירם' קאלענדאר.


פון די אמעריקאנער זייט, האט דער אמעריקאנער אמבאסאדאר צו די יו-ען, מייקל וואלטז, אוועקגעמאכט דעם אנגעבאט אלס א צינישע שריט געבויט אויף תנאים וואס טעהראן האט גוט געוואוסט אז זיי זענען אומאקצעפטירבאר, צוגעבנדיג אז אלע אפציעס בלייבן אויפן טיש.