גוטע נייעס פאר טרעוולער: מען וועט קענען אפלייען פאר א ערשטע-מאל פאספארט גענצליך אנליין


סעקרעטערי אוו סטעיט מארקא רוביא האט געמאלדן פרייליכע נייעס וואס וועט מאכן א סוף צו איינע פון די מערסט-אומאיינגענעמע גאווערנמענט פראצעדורן אין אמעריקע: דאס שטיין אין די לאנגע רייעס צו אפלייען פאר א ערשטע פאספארט.


אנגעהויבן פון קומענדיגן יאר, האט רוביא געמאלדן, וועלן אמעריקאנער בירגער קענען אריינגעבן אן אפליקאציע פאר זייער גאר ערשטע פאספארט גענצליך אנליין דורך א נייע פלאטפארמע מיטן נאמען America.gov. די נייע סיסטעם וועט ארבעטן מיט די הילף פון 'עי-איי' (AI) טעכנאלאגיע, און איז די ענטפער פון די אדמיניסטראציע צו די אלטע, צוריקגעשטאנענע גאווערנמענט וועבזייטלעך.


אפליקאנטן וועלן זיך קענען אריינלאגירן אויף א פארזיכערטע וועג דורך login.gov, און דערנאך ארויפלאדן אדער כאפן א פאספארט בילד גראד פונעם טעלעפאן אדער קאמפיוטער. די סיסטעם וועט האבן אן איינגעבויטע פעישעל-וועריפיקעישאן (פנים-ערקענונג) טעכנאלאגיע צו באשטעטיגן דעם אידענטיטעט פונעם מענטש. פון דארט און ווייטער וועט דער גאנצער פראצעס, אריינגערעכנט די פעימענט, פארקומען אנליין, מיט א מעגליכקייט צו טרעקן די סטאטוס פונעם פאספארט אין ריעל-טיים, אנשטאט צו דארפן טראכטן צי די אפליקאציע איז פארלוירן געווארן ערגעץ אין א גאווערנמענט פאסט-צימער.


רוביא האט קלאר ארויסגעברענגט וואס די נייע סיסטעם גייט טוישן: מער נישט קיין פאפירענע פארמען, מער נישט דארפן גיין כאפן א בילד אין א פארמאסי, קיין אפוינטמענטס, קיין ווארטן אין די ליין, און קיין אגענטן וואס בעטן אפצאלן פאר א זאך וואס דארף צו זיין בחינם און פשוט.


דער פראיעקט איז א טייל פון א פיל גרעסערע פלאן פון די טראמפ אדמיניסטראציע צו פאראייניגן די צענדליגע טויזנטער צעווארפענע פעדעראלע וועבזייטלעך אין איין צענטראלע 'עי-איי' געטריבענע פלאטפארמע פאר אלע בירגער. באאמטע רופן עס א לאנג-ערווארטעטע מאדערניזאציע, אבער דער פלאן ציט שוין קריטיק פון עקספערטן וואס זארגן זיך איבער דאטא סעקיוריטי, אידענטיטעט גניבות, און ווי פארזיכערט סענסיטיווע פריוואטע אינפארמאציע וועט באמת זיין איינמאל עס איז צענטראליזירט אויף איין 'עי-איי' פלאטפארמע.


דערווייל איז די ציל פון די אדמיניסטראציע אז רוב אמעריקאנער זאלן קענען אפרעכטן זייערע פאספארט געברויכן אויף America.gov ביז ענדע יאר 2027.