בס"ד

ריזיגע ריקאל אויף איבער 122,000 קעיסעס 'געיטארעיד' געטראנקען איבער 37 שטאטן

די 'פעפסיקאו' קאמפאני האט אראפגענומען פון די פאליצעס מער ווי 122,000 קעיסעס פון די פאפולערע 'געיטארעיד' (Gatorade) געטראנקען אין 37 שטאטן, נאכדעם וואס מ'האט אנטדעקט אז די געטראנקען אנטהאלטן סינטעטישע קאלירן וואס זענען קיינמאל נישט געווען ארויסגעשריבן אויפ'ן לעיבל.

די ריקאל נעמט אריין די 28-אונס באטלעך פון פיר פארשידענע פלעיווארס: לעמאן-ליימ, לעמאן-ליימ זערא, אראנדזש, און אראנדזש זערא. אין אלע פון די פלעיווארס האט מען געפונען די קאלירן "יעלאו נומער 5" אדער "יעלאו נומער 6" וואס זענען נישט געווען דעקלארירט אויפ'ן פעקעדזשינג.

פעפסיקאו האט פרייוויליג אנגעהויבן די ריקאל דעם 25'סטן סעפטעמבער, און די עף-די-עי (FDA) האט עס קלאסיפיצירט אלס א "קלאס 2" ריקאל דעם 2'טן אקטאבער. דאס באדייט אז די שאנסן פאר ערנסטע געזונט קאמפליקאציעס זענען ווייט, אבער נישט אוממעגליך. דערווייל זענען נאכנישט באריכטעט געווארן קיין שום פעלער פון מענטשן וואס זענען קראנק געווארן פון די באטראפענע געטראנקען.

כאטש ביידע קאלירן זענען גענצליך ערלויבט צו נוצן אין עסנווארג דורך די עף-די-עי, פארלאנגען די פעדעראלע געזעצן אז עס מוז זיין קלאר ארויסגעשריבן אויפ'ן לעיבל. די אגענטור זאגט אז סענסיטיווע מענטשן וואס קומען אין קאנטאקט מיט די קאלירן קענען ליידן פון אלערגישע רעאקציעס, אנגעהויבן פון לייכטע הויט-אויסשלאגן ביז אסטמא סימפטאמען, בפרט ביי מענטשן וואס זענען סענסיטיוו צו אספירין.

די באטראפענע באטלעך האבן ספעציפישע לאט קאודס מיט עקספיירעישאן דאטומס צווישן אפריל און יוני פון יאר 2027. די קאמפאני האט דערווייל נישט פובליקירט ווי אזוי דער טעות אויפ'ן לעיבל האט פאסירט, אבער קאנסומער אין די באטראפענע שטאטן וואס האבן די געיטארעיד פלעיווארס אינדערהיים ווערן געבעטן צו קאנטראלירן זייערע באטלעך בעפאר'ן טרינקען.