קאמישע גניבה אין אריזאנע: גנב ברעכט איין אין א טעק קאמפאני און אנטלויפט מיט... ליידיגע קעסטלעך!


אן איינברוך אין א טעק קאמפאני אין טעמפע, אריזאנע, האט איבערגעלאזט די ארבייטער סיי אויפגעטרייסלט און סיי אין א גוטע גיסטע, נאכדעם וואס א גנב האט אויסגעבראכן א פענסטער זונטאג פארטאגס און איז אנטלאפן מיט א הויפן קעסטלעך, וואס קיין איינס פון זיי האט למעשה גארנישט געהאט אינעווייניג.


אויף די סעקיוריטי קעמרעס קען מען זען ווי דער פארדעכטיגטער, אנגעטוהן מיט א פלעד שירט און א שווארצע בעיסבאל קעפל, צעשמעטערט דעם גלאז פונעם פענסטער ארום 2 אזייגער פארטאגס. אנשטאט אריינצוקריכן אינעווייניג, האט ער פשוט אריינגעשטעקט זיינע הענט דורך די בלאינדס און ארויסגעשלעפט צענדליגע "מעק מיני" (Mac Mini) קעסטלעך דורכ'ן לאך.


די קאמפיוטערס וואס קומען אין די קעסטלעך זענען ווערט צווישן 899 און 6,799 דאלאר, אבער דער גנב האט נישט געכאפט אז דאס זענען בלויז ליידיגע קעסטלעך וואס מ'נוצט פאר דיספלעי. די עכטע טייערע קאמפיוטערס זענען געליגן אינגאנצן אומבארירט בלויז עטליכע פיס אוועק.


אן ארבייטער אין די קאמפאני האט דערציילט פאר די לאקאלע נייעס סטאנציע אז ווען ער איז אנגעקומען אינדערפרי און געזען דעם צעבראכענעם פענסטער, האט ער גלייך געכאפט אז דער גנב איז אוועק מיט גארנישט אויסער פשוט'ע קארדבאורד. "בלויז ליידיגע קעסטלעך... אונזערע קאמפיוטערס זענען געליגן ממש דארט פארענט פון אים... א גאר נידעריגע IQ," האט דער ארבייטער געזאגט מיט א שמייכל. ער האט צוגעלייגט אז די גאנצע מעשה איז געווארן א גוטע דזשאוק אין אפיס. "יעדער האט געלאכט דערפון. איך בין פשוט פרייליך אז קיינער איז נישט געשעדיגט געווארן."


די קאמפאני האט אריינגעגעבן א פאליציי רעפארט ביי די לאקאלע טעמפע פאליציי דעפארטמענט און זיי אפפערן א 1,500 דאלאר באלוינונג פאר סיי וואספארא אינפארמאציע וואס וועט פירן צו אן ארעסט, האפנדיג אז עמיצער וועט דערקענען דעם פארשוין אויף די קעמרעס בעפאר ער פרובירט זיין מזל ערגעץ אנדערש. דערווייל האט די פאליציי נאך קיינעם נישט ארעסטירט אדער אידענטיפיצירט, איבערלאזנדיג דעם אידענטיטעט פונעם 'ווייניגסט-סוקסעספולן גנב' אלס א מיסטעריע.