שוידערליכע אנטיסעמיטישע אטאקע אין מאנטשעסטער: מיניבאס פון א היימישן איד אונטערגעצינדן און פארברענט


די גרעיטער מאנטשעסטער פאליציי פארשט אויס א פארדעכטיגטע אנטיסעמיטישע העיט קריים, נאכדעם וואס א מיניבאס וואס באלאנגט פאר א היימישן איד איז געווארן אונטערגעצינדן און אינגאנצן חרוב געווארן אין א בייזוויליגע אטאקע דעם פארגאנגענעם אקטאבער 9.


אויף די סעקיוריטי קאמערעס קען מען קלאר זען ווי צוויי פארמאסקירטע פארשוינען קומען אן אויף ביציקלעך צו א פארקינג לאט אינמיטן די נאכט, זיי צעברעכן די פענסטערס פונעם קאר, גיסן אריין א פלאמבארע פליסיגקייט און צינדן עס אונטער. דער מיניבאס איז אינגאנצן פארברענט געווארן, אבער ברוך השם עס זענען נישט געווען קיין פארוואונדעטע. די פאליציי זאגט אז זיי באהאנדלען דעם אינצידענט אלס א מעגליכע אנטיסעמיטישע אטאקע, און זיי קוקן יעצט איבער די קאמערעס און אלע דעטאלן ארום דעם פאל.


לאקאלע עסקנים און פירער פון די אידישע קאמיוניטי פאדערן יעצט אז מען זאל פארשטארקן די סעקיוריטי ארום די אידישע מוסדות און בתי מדרשים אין די געגנט, אנווייזנדיג אז די אטאקע פארשטארקט די שוין-אזוי-אויך אנגעצויגענע שטימונג צווישן די איינוואוינער.


די אידישע קאמיוניטי אין מאנטשעסטער טרויערט נאך אלס איבער די שוידערליכע אטאקע וואס איז פארגעקומען דעם פארגאנגענעם יום כיפור אין יאר 2025 ביים היטאן פארק שול, וואו צוויי מענטשן זענען אומגעקומען נאכדעם וואס א פארשוין האט אריינגעקראכט מיט א קאר אין די מתפללים און דערנאך געשטאכן איינעם פון זיי.


דער פרישער אינצידענט קומט אויך נאך א רייע פון פארדעכטיגטע אונטערצינדונגען אויף אידישע צילן איבער גאנץ ענגלאנד דעם יאר, אריינגערעכנט דאס פארברענען פון פיר קאמיוניטי אמבולאנסן אין נארט לאנדאן, און פייערן וואס זענען אונטערגעצינדן געווארן ביי כשר'ע רעסטוראנטן אין מאנטשעסטער.


דערווייל זענען נאך נישט פארגעקומען קיין ארעסטן אין פארבינדונג מיט די אטאקע, און די פאליציי אינוועסטיגעיטארס בעטן פונעם פובליק אז ווער עס האט סיי וואספארא אינפארמאציע זאל זיך פארבינדן מיט זיי.