דראמאטישע רעטונג אין פלארידע: פאליציי אפיציר שפרינגט אריין אין וואסער צו ראטעווען 72-יעריגן אינוואליד וואס איז אריינגעפאלן מיט זיין ווילטשער


א פאליציי סערדזשאנט אין וואלושיע קאונטי, פלארידע, ווערט געלויבט אלס א העלד נאכ'ן אריינשפרינגען אין די טונקעלע וואסערן צו ראטעווען א 72-יעריגן מאן וועלכער איז אריינגעפאלן פון זיין עלעקטרישע ווילטשער און זיך געהאלטן אין די לענג פאר איבער א שעה צייט.

דער 72-יעריגער ביל וואן הערבוליס, וועלכער איז פאראליזירט שוין 19 יאר נאך אן ערנסטע האלדז-וואונד, האט געהאלטן אינמיטן א פיש-כאפן רייזע דעם 27'סטן סעפטעמבער. זיין וועגעלע מיט געצייג האט זיך אנגעשטויסן אין א קעסטל אויפ'ן דאק, וואס האט געפירט דערצו אז זיין ווילטשער זאל זיך איבערדרייען און ער איז אריינגעפאלן גראד אין די וואסערן, א געגנט וואס איז באקאנט צו זיין אנגעפילט מיט הייפישן (sharks).

אן אומבאקאנטער פערזאן וואס איז געשטאנען אינדרויסן פון די פארשלאסענע טויערן האט געהערט דעם פלאטשקע און די געשרייען פאר הילף, און האט באלד גערופן 911. ארום 9 אזייגער ביינאכט זענען סערדזשאנט וויליאם לעווען און זיין שותף אנגעקומען צום סצענע. לעווען האט זיך שנעל אויסגעטון זיין פאליצייאישע פאסיק מיט'ן רעוואלווער, אנגעכאפט א רעטונגס-רינג, און אריינגעשפרינגען אין די הויכע כוואליעס.

די באדי-קעמ ווידעא וואס די פאליציי האט ארויסגעגעבן צייגט ווי דער אפיציר שווימט אריבער שארפע שעלס און שטערונגען, ביז ער האט דערגרייכט דעם אויסגעמוטשעטן מאן, וועלכער האט זיך פארצווייפלט אנגעהאלטן אין אן עלעקטרישע רער. מיט די הילף פון אנדערע אפיצירן און ארומיגע האבן זיי אים ארויסגעצויגן צו זיכערהייט און אויך ארויסגעראטעוועט א טאש מיט זיינע חפצים וואס האט געשווימען אויפ'ן וואסער.

צום וואונדער פון יעדן, האט דער עלטערער איד אפגעזאגט סיי וועלכע מעדיצינישע באהאנדלונג אויפ'ן ארט. ער האט בלויז געבעטן מען זאל אים צוריק אריינזעצן אין זיין ווילטשער און ער וויל אהיימגיין. נאך מער אינטערעסאנט איז געווען, אז גלייך צומארגנס איז ער צוריקגעקומען צום זעלבן פלאץ צו כאפן פיש, באווייזנדיג אז אפילו א שרעקליכע איבערלעבעניש אין וואסערן פול מיט פרעדאטארס קען אים נישט אפשטעלן פון זיין באליבטע האבי.

די פאמיליע פונעם געראטעוועטן האט שפעטער אנגערופן דעם אומבאקאנטן רופער אן "מלאך פון הימל", טראץ וואס יענער האט מעגליך אפילו נישט געדארפט זיין דארט ביים פארשלאסענעם דאק. דער העלדישער סערדזשאנט לעווען ערווארטעט יעצט צו באקומען א ספעציעלע 'לייפסעיווינג' אויסצייכענונג פון די פאליציי דעפארטמענט פאר זיין קוראזש און שנעלע האנדלונג אריינצושפרינגען אין די געפארפולע וואסערן צו ראטעווען א לעבן.