בס"ד


שרעקעדיגע מינוטן: א ריזיגע וואלפיש קראכט אריין אין א פישעריי שיפל נעבן לאנג איילענד


א רוטינע רייזע אויפן וואסער צו כאפן פיש נעבן לאנג איילענד, האט זיך פארוואנדלט אין א הארץ-קלאפנדע איבערלעבעניש דעם פארגאנגענעם שבת, אקטאבער 10, ווען א ריזיגע 'האמפבעק' וואלפיש האט אריינגעקראכט אין א שיפל נעבן די 'מאריטשעס אינלעט'.


סטיווען הייד און זיין גרופע האבן באמערקט דעם ריזיגן ים-באשעפעניש עסן 'באנקער' פיש עטליכע הונדערט פיס אוועק פון זייער שיפל. זיי האבן תיכף אויסגעלאשן זייער מאטאר, א שריט וואס ווערט רעקאמענדירט דורך עקספערטן כדי צו פארמיידן אז דער וואלפיש זאל חלילה ווערן פארוואונדעט פונעם פראפעלער.


א ווידעא פונעם אינצידענט צייגט ווי דער וואלפיש שווימט מיט א געוואלדיגע שנעלקייט צום שיפל, בשעת צענדליגע קליינע פיש שפרינגען אין די לופטן ארויס פון וואסער, און דערנאך קראכט דער וואלפיש אריין אין די זייט פונעם שיפל מיט אזא קראפט אז א טיר האט זיך אויפגעפראלט, איבערלאזנדיג צוויי פיש אויפן דעק. די גאנצע פאסירונג האט זיך אפגעשפילט אין בלויז עטליכע סעקונדעס. הייד האט שפעטער איבערגעגעבן אז ברוך השם סיי דאס שיפל און סיי דער וואלפיש זענען ארויס אומגעשעדיגט, און קיינער אויפן שיפל איז נישט פארוואונדעט געווארן.


עקספערטן וועלכע האבן איבערגעקוקט די ווידעא זאגן אז עס זעט אויס צו זיין א אינגע וואלפיש וואס איז פשוט געווען פארנומען כאפן אירע עסן - א נאטורליכע אויפפירונג וואו די וואלפישן שווימען ארויף מיט אן אימפעט צו כאפן גרויסע סטאדעס פיש. זיי ערקלערן אז דער וואלפיש האט קלאר נישט געהאט קיין כוונה צו אטאקירן דאס שיפל, נאר האט פשוט נאכגעיאגט איר פרישטאג.


די שרעקעדיגע פאסירונג קומט אין א צייט וואס מער און מער וואלפישן ווערן געזען אין די ניו יארקער וואסערן, צוליב די גרויסע צאל פיש וואס געפינען זיך דארט לעצטנס. דאס פאסירט בלויז צוויי מאנאטן נאכדעם וואס גאווערנאר קעטי האוקעל האט אונטערגעשריבן דעם "ניו יארק וואלפיש אכטונג געזעץ" דעם 10'טן אוגוסט.


דאס נייע געזעץ פאדערט אז מען זאל צולייגן ספעציעלע אינסטרוקציעס איבער ווי אזוי זיך צו פירן ארום וואלפישן צו די סטעיט'ס זיכערהייט קורסן פאר שיפל-טרייבער און ביים רעגיסטרירן א שיפל. נאטור-שיצער ארגאניזאציעס בעטן די פובליק צו בלייבן ווייניגסטנס 300 פיס אוועק פון די וואלפישן און שטענדיג אויסלעשן דעם מאטאר אויב איינס קומט צו נאנט.