דראמאטישע אנטלויף פרואוו דורכגעפאלן: א קופער גנב האט ארויסגעשפרונגען פון א פענסטער אבער איבערגעלאזט זיין איי-די
אקלאהאמע: א גנב האט זיך ארויסגעווארפן פון א פענסטער צו אנטלויפן פון די פאליציי, אבער האט איבערגעלאזט זיין 'איי-די'
א 24-יעריגער מאן אין אקלאהאמע האט פרובירט אדורכצופירן א דראמאטישע אנטלויף פון די ארטיגע שעריף דעפיוטיס, ווען ער האט זיך ארויסגעווארפן מיטן קאפ פאראויס דורך א גלאזערנע פענסטער פון א ליידיגע הויז וואו ער איז געכאפט געווארן אינמיטן גנב'ענען.
דער פארדעכטיגטער, רעיווען לי וואוטען, איז געכאפט געווארן ביי די מעשה דורך די אקלאהאמע קאונטי שעריף אפיצירן אינעם ליידיגן הויז, פונקט ווען ער האט געהאלטן אינמיטן ארויסרייסן קאפער ווייערס פון א דישוואשער. ווען איינע פון די דעפיוטיס האט אים באפוילן זיך אויסצודרייען און אראפגיין אויף די קני, האט וואוטען אנשטאט דעם אנגעהויבן לויפן ארום די קאך, און אין א ווילדע פרואוו צו אנטלויפן, האט ער זיך אריינגעווארפן דורך א פענסטער, פונקט ווי אין א פילם.
כאטש די ווילדע שפרונג האט אים טאקע געהאלפן אנטלויפן אויף דער מינוט, האט ער אבער געמאכט א גרויסע טעות וואס האט גרינגערהייט געהאלפן די פאליציי אים צו טרעפן. אין זיין איילעניש האט ער איבערגעלאזט זיין בעקפעק אינעם הויז, וואס האט אנטהאלטן זיין 'איי-די' און אנדערע פערזענליכע אינפארמאציע.
א דאנק דעם איבערגעלאזטן בעקפעק, האבן די אינוועסטיגעיטארס אים גאר שנעל אידענטיפיצירט, אויפגעזוכט און ארעסטירט. וואוטען שטייט יעצט אויס ערנסטע קלאגעס פון בורגלערי, ווידערשטאנד צו אן ארעסט, און שטערן א פאליציי אפיציר. די קאמישע פאסירונג דינט אלס א גוטע דערמאנונג אז א דראמאטישע אנטלויף קען זיך זייער שנעל אויסלאזן מיט א דורכפאל ווען מען לאזט איבער עווידענס אונטער זיך.
