היסטארישע 'סיטי האל' אין פראנקרייך פארברענט ביזן גרונט נאך ווילדע פראטעסטן


איינע פון פראנקרייך'ס מערסט היסטארישע שטאטראט געביידעס איז ארויפגעגאנגען אין פלאמען, איבערלאזנדיג א שווערן חורבן, נאכדעם וואס א גרופע ווילדע פראטעסטירער האבן אונטערגעצינדן דעם בנין.


דעם פארגאנגענעם שבת, אקטאבער 17, 2026, זענען פארגעקומען מאסיווע פראטעסטן איבער גאנץ פראנקרייך קעגן די הויכע 'קאסט אוו ליווינג' פרייזן. רוב פון די דעמאנסטראציעס זענען אריבער פרידליך, אבער אין די שטאט לימאזש האט זיך עס געענדיגט מיט א קאטאסטראפע.


לויט עדות, האט א גרופע מאסקירטע חברה אונטערגעצינדן א פאליציי קאר אינדרויסן פונעם לאקאלן 'סיטי האל', און דערנאך האבן זיי אויסגעשאסן די פענסטערס און זיך אריינגעבראכן אינעם בנין. דאס פייער האט אויסגעבראכן ארום 6 אזייגער פארנאכטס און האט זיך גאר שנעל פארשפרייט. די פלאמען האבן דערגרייכט דעם דאך און אראפגעברענגט דעם היסטארישן גלאקן-טורעם, בשעת פייערלעשער האבן געקעמפט מיט די פלאמען מיט הויכע לייטערס אריין טיף אין די נאכט אריין. שוידערליכע ווידעאס ווי די פלאמען פארציקן דעם אלטן בנין פון יאר 1883 זענען ברייט פארשפרייט געווארן אנליין.


דער לאקאלער פרעפעקט, מאריס באראט, האט איבערגעגעבן אז דער דאך איז איינגעפאלן אויף די אונטערשטע שטאקן, אויסער איין פליגל פונעם בנין, און אז בערך צוויי דריטל פונעם אינדרויסנדיגן פאסאד איז שוין חרוב. ער האט עס אנגערופן "כמעט אינגאנצן פארלוירן" און א קאטאסטראפע פאר די היסטאריע פונעם ראיאן. ער האט באשולדיגט אז דאס איז געווען א דירעקטע אקט דורך ווילדע כאליגאנעס, כאטש עדות זאגן אז דאס זענען געווען פראטעסטירער וואס האבן זיך אפגעטיילט פונעם הויפט פראטעסט.


די סיטי האל געביידע איז געבויט געווארן מיט אינספיראציע פונעם פאריזער סיטי האל און איז אין יאר 1975 דערקלערט געווארן אלס אן אפיציעלע היסטארישע לאנדמארק. אין די זעלבע צייט זענען עטליכע געשעפטן אין צענטער פון שטאט אויסגעראבירט געווארן יענעם אוונט דורך די ווילדע מאסן.


די פולע פארנעם פונעם שאדן ווערט נאך יעצט געשאצט דורך די אינסטאנצן. די הויפט פראגעס זענען יעצט ווער עס שטייט אונטער די אטאקע, אויב מען וועט קענען ברענגען די שולדיגע צו גערעכטיגקייט, און ווי אזוי אזא שווערע פארלוסט וועט אפעקטירן דעם פובליק'ס בליק אויף די פראטעסטן באוועגונג וואס איז געווענליך א פרידליכע.