איז א דראון נאך אלץ בלויז א דראון? באקענט זיך מיטן נייעם הייבריד "רוסטער" דראון וואס פליט און קייקלט זיך


דער ענטפער צו די פראגע ווערט אלץ שווערער צו ענטפערן. א פערפעקטע ביישפיל דערצו איז דער "רוסטער" (ROOSTER), א נייע סארט דראון פראדוצירט דורך די מדינת ישראל קאמפאני "ראבאטיקאן" (Robotican). דער דראון איז געבויט אויף אן אופן אז עס קען סיי פליען אין די לופטן, סיי לאנדן און זיך קייקלען אויף דער ערד דורך שמאלע ערטער, און דערנאך צוריק זיך הייבן אין די לופטן ווען עפעס בלאקירט דעם וועג.


דער דראון זיצט אינעווייניג אין א ספעציעלע שוץ-קעסטל (קעידזש) וואס לאזט אים זיך קייקלען אויף פלארס און אין טונעלן, און ווען עס קומט אן צו טרעפ, מעבל אדער אנדערע שטרויכלונגען, צינדן זיך אן די פראפעלערס און עס הייבט זיך אריבער. דאס קייקלען שפארט א סאך טייערע בעטערי, וויבאלד עס קען זיך קייקלען פאר א סאך לענגער ווי עס קען בלייבן אין די לופטן. עס איז ספעציעל דיזיינט פאר געביידעס, טונעלן און פלעצער וואו 'דזשי-פי-עס' (GPS) ארבעט נישט. דער מאשין איז גאנץ קליין, עס וועגט ארום 1.5 קילאגראם, און געווענליך ארבעט עס אין א גרופע פון דריי דראונס וואס זענען קאנעקטעד צו איין קאנטראל סטאנציע.


די גרעסערע נייעס דא איז, אז די סארט טעכנאלאגיע ווערט אלץ מער פארשפרייט, און אטאנאמישע פלאטפארמעס ווערן מער נישט דעפינירט לויט איין וועג פון זיך באוועגן, נאר ענדערש לויט ווי גוט זיי קענען זיך צופאסן צו זייער ארום. די קאמפאני זאגט אז דער "רוסטער" ווערט שוין גענוצט דורך די צה"ל קרעפטן און דורך די אמעריקאנער 'די-אי-עי' (DEA) אגענטור. ווי אויך האבן זיי שוין דעליווערט צענדליגע שטיק פאר אייראפעאישע ספעציעלע אפעראציעס און אינטערווענץ טיעמס, און די סיסטעם האט אפילו באקומען א נאטא (NATO) סטאק נומער.


עס איז אבער פארהאן אן ערנסטע זייט צו די מעשה. די קאמפאני האט אויך ארויסגעשטעלט א באוואפנטע ווערסיע פונעם דראון. דאס ברענגט ארויף פרישע פראגעס איבער ווי אזוי אזעלכע געצייג זאלן גענוצט און רעגולירט ווערן. עס קען קומען א צייט וואס אנרופן די מאשינען פשוט "דראונס" וועט מער נישט מאכן קיין סענס, פונקט ווי אונזערע סמארטפאונס זענען שוין לאנג נישט בלויז קיין טעלעפאנען. די עכטע פראגע איז, ווי אזוי מיר וועלן זיי רופן ווען פליען וועט זיין בלויז איינס פון די פילע שטיקעס וואס זיי קענען טון.