בס"ד

פרעזידענט טראמפ: "אפצוהאלטן איראן פון א נוקלעארע וואפן איז פון אונזערע גרעסטע אויפטוען"


וואשינגטאן. – פרעזידענט דאנאלד טראמפ האט מיטוואך געזאגט פאר רעפארטערס אז דאס אפצוהאלטן איראן פון באקומען א נוקלעארע וואפן איז איינע פון די גרעסטע זאכן וואס זיין אדמיניסטראציע האט אויפגעטוהן.


דער פרעזידענט האט צוגעגעבן אז עס האט געפאדערט אסאך קוראזש, וויבאלד קיין שום אנדערע פרעזידענט איז נישט געווען גרייט צו נעמען די נויטיגע שריט. ער האט קלארגעשטעלט אז איראן וואלט שוין לאנג גענוצט מאסיווע נוקלעארע וואפנס אויב אמעריקע וואלט זיך צוריקגעהאלטן, און אונטערגעשטראכן אז ער האט בכלל נישט קיין חרטה איבער די מלחמה קעגן איראן.


די קאמענטארן קומען אין די זעלבע צייט וואס באריכטן געבן אן אז די אדמיניסטראציע באטראכט די מעגליכקייט פון פרישע ברייט-פארנעמיגע מיליטערישע סטרייקס, נאך וואכן פון געשפרעכן איבער וויאזוי צו ענדיגן דעם קאנפליקט.


פון די אנדערע זייט, ווארפט טעהראן אפ די באשולדיגונגען. דער איראנער אויסערן מיניסטער, אבאס אראגטשי, האט א טאג פריער געזאגט אז די גאנצע נוקלעארע קאנפליקט איז בלויז א תירוץ, טענה'נדיג אז וואשינגטאן איז פשוט קעגן איראן'ס אידעאלאגיע און האט זיך ארויסגעצויגן פונעם פריערדיגן אינטערנאציאנאלן אפמאך אן קיין שום באווייזן. איראנער פירער האבן אויך עטליכע מאל איבערגעחזר'ט אז נוקלעארע וואפנס זענען פארבאטן לויט זייער רעליגיע, א פאזיציע וואס דער איראנער פרעזידענט מאסוד פאזעשקיאן האט נאכאמאל ארויסגעברענגט אין סעפטעמבער.


דערווייל זענען די אנגעצויגנקייטן נאך אלץ זייער הויך ארום דעם וויאזוי אויסצופירן דעם 14-פונקטן מעמאראנדום וואס איז אונטערגעשריבן געווארן אין יוני, מיטן ציל צו ענדיגן די פיינטליכקייטן און עפענען דעם וועג פאר פרישע נוקלעארע פארהאנדלונגען. דאס לאזט איבער גרויסע פראגע צייכנס: ווי נאנט איז איראן באמת געווען צו א באמבע, און וואס וועט פאסירן קומענדיגע אויב די דיפלאמאטישע געשפרעכן וועלן דורכפאלן.