ווירדזשיניע: 27-יעריגער מאן ארעסטירט פארן אנמאכן שווערע שאדנס צו א היסטארישע מאנומענט מיט א האמער


די פאליציי האט ארעסטירט א 27-יעריגן מאן פון סטאפארד, ווירדזשיניע, נאכדעם וואס ער איז געכאפט געווארן מיטוואך ביינאכט ווי ער האקט מיט א שווערן האמער (sledgehammer) אויף די באקאנטע 'איווא דזשימא' סטאטוע, נעבן די הויפט אריינגאנג פון די קוואנטיקא מארין באזע.


פאליציי אפיצירן וועלכע זענען גערופן געווארן צום אינטערסעקשאן פון ריטשמאנד הייוועי און פולער ראוד ארום 10:13 ביינאכט, האבן אים געטראפן אינמיטן אקט פון אנמאכן חורבנות צום מאנומענט און אים תיכף ארעסטירט. דער קאפ פון איינע פון די פיגורן אויפ'ן סטאטוע איז אראפגעהאקט געווארן און געטראפן געווארן אויף דער ערד. די פאליציי שאצט די שאדנס אויף הונדערטער טויזנטער דאלארן.


דער פארדעכטיגטער, מיגעל אלאנסא מאלדאנאדא סאריאנא, איז אנגעקלאגט געווארן מיט עטליכע הארבע קלאגעס, אריינגערעכנט פארניכטן פראפערטי און שעדיגן א מאנומענט. ער ווערט יעצט געהאלטן אין טורמע אן קיין מעגליכקייט זיך ארויסצוקויפן אויף בעיל ביז זיין געריכטליכע פארהער.


די סטאטוע איז געמאכט געווארן פון קאלכשטיין דורך דעם ארטיסט פעליקס דע וועלדאן, דער זעלבער וואס האט געמאכט די גרויסע מארין קארפס מעמאריאל אין ארלינגטאן. עס צייגט די מארינען וועלכע האבן אויפגעהויבן די פאן אויף איווא דזשימא ביי די צווייטע וועלט קריג. די קלענערע ווערסיע איז שוין פארטיג געווארן ענדע 1945, בעת די גרויסע אין ארלינגטאן איז ערשט געענדיגט געווארן אין 1954.


כאטש די פאליציי האט נאכנישט ארויסגעגעבן קיין מאטיוו פארוואס ער האט געצילט דעם סטאטוע, האבן געוויסע נייעס קוועלער באריכטעט בשם פעדעראלע באאמטע, אז ער איז א מעקסיקאנער בירגער וועמענס 'דאקא' (DACA) אימיגראציע שוץ איז אפגעלאפן דעם יאר. די פאליציי האט אבער נישט באשטעטיגט די אינפארמאציע אדער א פארבינדונג צווישן זיין סטאטוס און דעם אינצידענט.


דערווייל בלייבט א גרויסע פראגע צייכן וואס עס האט אים געטריבן צו טון דעם אקט, און ווי אזוי די שטאט וועט זיך אומגיין מיט די קאמפליצירטע און טייערע פאריכטונגען.