באאינג פירמע שטעלט אהער די '777 פרעיטער' פליגערס אלס די צוקונפט פון גלאבאלע קארגא טראנספארטאציע


די באקאנטע 'באאינג' פליגער פירמע פלאנירט צו נוצן אירע '777 פרעיטער' (קארגא) פליגערס אלס די הויפט געצייג פאר לאנג-שטרעקיגע קארגא אוויאציע, איבערנעמענדיג דעם פלאץ פונעם היסטארישן 747 פליגער, וואס איז באקאנט איבער דער וועלט אלס די "קעניגין פון די הימלען".


אין א נייע פראמאציע ווידעא וואס די פירמע האט ארויסגעגעבן, זעט מען קאמפיוטער-גענערירטע בילדער פון די פליגערס אין די לופטן און אויף די עירפארט ראנוועיס, וואו באאינג לייגט אראפ די וויכטיגע ראלע וואס די 777 פליגערס שפילן אינעם טראנספארטירן סחורה איבער די אינטערנאציאנאלע מארקעטס.


זינט עס איז אריין אין באנוץ אין יאר 2009, איז די 777F געווארן איינע פון די מערסט-באנוצטע קארגא פליגערס אין די אינדוסטריע. עירליינס פארלאזן זיך שטארק דערויף אדאנק איר מעגליכקייט צו פליען לאנגע שטרעקעס, איר מאסיווע קאפאציטעט, און די עפעקטיווקייט פון אירע צוויי מאטארן. דער פליגער קען טראגן א וואג פון ביז 107 מעטריק טאן סחורה, און קען פליען ארום 5,000 מייל אן זיך דארפן אפשטעלן אינמיטן צו אנפילן ברענשטאף. דאס העלפט קארגא פירמעס שניידן קאסטן, פארבעסערן דעליווערי צייטן, און באהעפטן די גרויסע האנדל צענטערן אסאך גרינגער.



דער קומענדיגער שריט: דער 777-8 מאדעל


דער קומענדיגער שריט אין באאינג'ס קארגא סטראטעגיע איז דער נייער '777-8 פרעיטער', א נעקסטע-גענעראציע פליגער וואס איז אויסגעשטאט מיט די נייעסטע טעכנאלאגיע פון די 777X פאמיליע. לויט באאינג, וועט דער נייער מאדעל קענען טראגן א מאקסימום וואג פון 118 מעטריק טאן, וואס איז מיט 17 פראצענט מער פלאץ ווי די יעצטיגע 777 מאדעלן. דערצו וועט עס פארנוצן מיט 30 פראצענט ווייניגער ברענשטאף און ארויסלאזן ווייניגער שעדליכע גאזן אין פארגלייך צום אלטן 747-400 פליגער וואס עס גייט איבערנעמען.


דער ציל פונעם נייעם פליגער איז צוזאמצושטעלן די ריזיגע קאפאציטעט פון די גרויסע פיר-מאטאר פליגערס מיט די ביליגע און עפעקטיווע אפעראציע פון א מאדערנע צוויי-מאטאר פליגער. מיט די כסדר'דיגע וואוקס פון אי-קאמערס (אנליין שאפינג), עקספרעס דעליוועריס און די אינטערנאציאנאלע סופליי טשעין, ערווארט באאינג אז די נייע גענעראציע קארגא פליגערס וועלן שפילן א גאר וויכטיגע ראלע אין די צוקונפט פון קארגא טראנספארטאציע.


כאטש עס איז נאך נישט קלאר פונקטליך ווען דער 777-8F וועט אפיציעל אריינגיין אין באנוץ, וויבאלד עס דארף נאך אדורך גיין פארשידענע דעוועלאפמענט און סערטיפיקאציעס, צייגט עס אבער אויף די אלגעמיינע ריכטונג פון די אוויאציע אינדוסטריע צו טראגן גרעסערע מאסן סחורה אויף לענגערע שטרעקעס, בשעת'ן שפארן ברענשטאף און האלטן די קאסטן נידריג.