בס"ד

שווארצע וואסערן: ברעגעס אין די פאראייניגטע אראבישע עמיראטן פארמאכט נאך מאסיווע אויל-גיסונג

ווידעא קליפס פון 'אום אל קוויין' אין די פאראייניגטע אראבישע עמיראטן (UAE) צייגן שווארצע וואסערן און אויל וואס שוועמט ארויף אויף די לאקאלע ביטשעס נאך א מאסיווע אויל-גיסונג פון א טאנקיר שיף. די עמיראטן'ס מיניסטעריום פון קלימאט טויש האט באשטעטיגט דעם פארגאנגענעם אקטאבער 23 אז זייערע סיסטעמען האבן אויפגעכאפט דעם רינען, און אלע ביטשעס אין די געגנט זענען געווארן הערמעטיש פארמאכט ביז די טעכנישע טיעמס וועלן ענדיגן זייערע אונטערזוכונגען.

אלס א פראקאוציע שריט האט די שטאט שארדזשא פארמאכט די 'על כאמריא' ביטש נעבן די גרעניץ, און שבת, אקטאבער 24, האט די ראס-אל-כיימא ראיאן געמאלדן אז אלע אירע ביטשעס וועלן זיין פארמאכט ביז א ווייטערדיגע מעלדונג. פישער און אנדערע וואס נוצן דעם ים זענען געווארנט געווארן זיך צו האלטן ווייט פון די אנגעשטעקטע וואסערן און פאלגן די אפיציעלע אנווייזונגען. דערווייל קומען פאר גרויסע רייניגונג אפעראציעס און שאצונגען צו מעסטן דעם חורבן אויפן ברעג.

די קוואל פון די אויל-גיסונג ווערט נאך אלס אויסגעפארשט. א ראדאר סעטעלייט בילד פון אקטאבער 21 האט געוויזן ווי אויל רינט פון א טאנקיר שיף ארום 25 קילאמעטער אפגערוקט פון די 'אום אל קוויין' ברעגעס. לויט געוויסע באריכטן איז די רינונג געקומען אלס רעזולטאט פון א דראון סטרייק אויף א טאנקיר אינעם 'הארמוז דורכגאס', כאטש די עמיראטן רעגירונג האט עס נאך נישט אפיציעל באשטעטיגט.

איינוואוינער אין אום אל קוויין, שארדזשא און אדזשמאן האבן שוין פאר עטליכע טעג געשפירט א שטארקע, מאדנע גערוך אין די לופטן, אבער די מיניסטעריום האט בארואיגט אז עס שטעלט נישט פאר קיין שום געזונט ריזיקע. דער שווערער גערוך האט נאך אנגעהאלטן פרייטאג, און באאמטע האבן נאך נישט ארויסגעגעבן קיין דעטאלן איבער וויפיל אויל עס האט זיך אויסגעגאסן אדער ווי לאנג די ביטשעס וועלן בלייבן פארמאכט. די הויפט פראגעס יעצט זענען ווי שטארק די ים-לעבן וועט ווערן אפעקטירט, ווער עס טראגט די פאראנטווארטליכקייט, און ווען די איינוואוינער וועלן קענען צוריקגיין צום וואסער.