טעראר באהעלטעניש אויפגעדעקט: יארדאנישע קרעפטן כאפן דריי פארדעכטיגטע נאך טויטליכע שיסעריי אין קאראק


יארדאנישע זיכערהייט קרעפטן האבן אנטדעקט די באהעלטעניש פון דריי באוואפנטע פארדעכטיגטע וועלכע זענען פארמישט אין א טויטליכע שיסעריי וואס איז פארגעקומען אין די שטאט קאראק. די זוכענישן האבן זיך געענדיגט דעם 26'סטן אקטאבער מיט א שיסעריי אין א פארלאזטע הויז וואו די פארדעכטיגטע האבן זיך אויפגעהאלטן.


לויט די באריכטן, זענען אלע דריי פארדעכטיגטע פארוואונדעט געווארן דורכאויס דעם אויסטויש פון פייער, בשעת קיינער פון די זיכערהייט קרעפטן זענען נישט געשעדיגט געווארן. די אטאריטעטן האבן אויך געפונען געווער און אמוניציע אויפ'ן ארט. יארדאנישע באאמטע האבן אנגערופן די פארדעכטיגטע אלס "עקסטרעמיסטישע טעראריסטן", כאטש קיין שום טעראר גרופע האט דערווייל נישט גענומען פאראנטווארטליכקייט אויף די אטאקע.


די יעצטיגע אפעראציע קומט נאך א שוידערליכע שיסעריי וואס איז פארגעקומען דעם 23'סטן אקטאבער ביי א לוויה אין א גריכישע ארטאדאקסישע קירכע אינעם דארף האמוד, וואו 9 מענטשן זענען אומגעקומען און נאך 40 זענען פארוואונדעט געווארן. די אטאקע האט פארוואנדלט די לוויה אין א בלוט-באד, און האט געפירט צו א מאסיווע זיכערהייט אפעראציע וואס האט עווענטועל געפירט די אויספארשער צו די באהעלטעניש פון די טעראריסטן אין קאראק.


די געפונענע געווער און אמוניציע וועט ארויסהעלפן די אויספארשער צו דערגיין מער דעטאלן ארום די אטאקע און צו זען אויב נאך מענטשן זענען געווען פארמישט. דערווייל האבן די אטאריטעטן נישט ארויסגעגעבן קיין קלארע אינפארמאציע איבער די גענויע מאטיוון פון די טעראריסטן אדער אויב זיי זענען פארבינדן צו א גרעסערע ארגאניזאציע, איבערלאזנדיג עטליכע הויפט פראגעס ארום די אטאקע אומפארענטפערט.