באקאנטער צירונגען הענדלער איבערראשט בארא פארקער איינוואוינער מיט אומערווארטעטע מתנות אויפ'ן גאס


דער באקאנטער סעלעבריטי צירונגען הענדלער, באקאנט אלס "TraxNYC", האט אפגעשטאט א באזוך אין בארא פארק, וואו ער האט איבערראשט פארבייגייער אויפ'ן גאס דורכ'ן אויסטיילן בחינם זילבערנע מטבעות און אנדערע קליינע צירונגען.


אין א ווידעא וואס פארט ארום אויף די היימישע וואטסעפ גרופעס, קען מען זען ווי דער מאן טיילט אויס די טייערע ארטיקלען פאר מענטשן וואס זענען דורכגעגאנגען אויפ'ן גאס בעת זיין באזוך.


לויט ווי עס ווערט באריכטעט, האבן זיך אפגעשפילט עטליכע אינטערעסאנטע סצענעס. איין עלטערער איד האט לכתחילה געמיינט אז די זילבערנע מטבע וואס ער האט באקומען איז בלויז א טשאקאלאד קוין, און א צווייטער פארבייגייער האט אויסגענוצט די געלעגנהייט און געבעטן נאך עטליכע שטיקלעך כדי אהיימצוטראגן פאר די אייניקלעך.


די אומערווארטעטע חלוקה האט געצויגן גרויס אויפמערקזאמקייט אין די געגנט, ווען איינוואוינער האבן זיך אנגעשטויסן אינעם צירונגען הענדלער אינמיטן העלן טאג.