7:00 אוונט ארץ ישראל צייט — בענעט'ס 'ביחד' פארטיי באשולדיגט די ליכוד אין אומלעגאלע שפירן וויילער ביי די קלפיס

געוועזענער פרעמיער מיניסטער נפתלי בענעט'ס 'ביחד' פארטיי האט אריינגעגעבן אן אפיציעלע קלאגע צו די צענטראלע וואל קאמיטע, באשולדיגנדיג אז פארשטייער פון די ליכוד פארטיי נוצן א סמארטפאן עפפ אומלעגאל צו נאכפאלגן וויילער ביי די שטים בודקעס.

לויט די קלאגע, ווערט אינפארמאציע איבער וויילער וואס קומען אן שטימען גלייך איבערגעגעבן פאר ליכוד באאמטע.

די וואל קאמיטע האט אבער אפגעווארפן די באשולדיגונגען, זאגנדיג אז זיי האבן דערווייל נישט באקומען קיין שום קראנטע באווייזן דערויף.

'ביחד' האט אויך אריינגעגעבן אן עקסטערע קלאגע איבער די 'עלעקטאר' עפפ ביי א קלפי אין די אונטערשטע גליל.

דערווייל איז נאכנישט אויפגעוויזן געווארן קיין שום געזעץ-ברעכונג איבער די אלע באשולדיגונגען.

6:30 אוונט ארץ ישראל צייט — וואל קאמיטע זאגט אז עס איז נישטא קיין באווייזן אויף סיסטעמאטישע פעלשונגען טראץ קלאגעס

די צענטראלע וואל קאמיטע האט קלארגעשטעלט אז עס איז נישטא קיין שום באווייזן אז מען זאל האבן סיסטעמאטיש געפעלשט אדער געטשעפעט מיט די שטים צעטלעך, טראץ וואס עטליכע פארטייען האבן זיך אפגעגרעדט איבער אומגעווענליכקייטן ביי קלפיס איבער'ן לאנד.

די קלאגעס האבן אריינגערעכנט באריכטן איבער פעלנדיגע אדער צעריסענע שטים צעטלעך און פארדאכטן איבער פרואוון צו שטערן דעם וואל פראצעס.

די קאמיטע האט אונטערגעשטראכן אז יעדע איינצלנע אינצידענט ווערט גלייך באהאנדלט, און האט געבעטן פונעם ציבור זיך צו פארלאזן בלויז אויף אפיציעלע אינפארמאציע און נישט אויף פאלשע קלאנגען וואס פארשפרייטן זיך אויפן אינטערנעט.

זייער סטעיטמענט רעכנט נישט אויס קיין איינצלנע פעלער, אבער צייגט אן אז באאמטע האבן נישט געפונען קיין שום ארגאניזירטע פלאן צו פעלשן די וואלן.

6:00 אוונט ארץ ישראל צייט — כנסת דעפוטאט אחמד טיבי פארמישט אין א ווילדע קאנפראנטאציע ביי א קלפי אין טייבע

זעט ווידעא דא אויבן.

טייבע, ארץ ישראל, אקטאבער 27, 2026 — דער אראבישער כנסת דעפוטאט אחמד טיבי איז לויט באריכטן געווארן אריינגעצויגן אין א היציגע קאנפראנטאציע ביי א שטים בודקע אין די אראבישע שטאט טייבע דורכאויס די היינטיגע וואלן.

אין א ווידעא וואס צירקולירט אויף די סאציאלע נעצן קען מען זען ווי טיבי טענה'ט זיך הויך מיט אן אנדערן מאן אינעווייניג אינעם קלפי.

אנדערע באריכטן געבן אן אז די קריגעריי איז געווען צווישן טיבי און די קלפי באאמטע איבער שפעטיגונגען און לאנגע רייעס.

די פונקטליכע צייט פונעם אינצידענט און ווער דער צווייטער פערשוין איז, איז דערווייל נישט קלאר.
 

5:42 נאכמיטאג ארץ ישראל צייט — שטימען ראטע שפרינגט צו 55.7%, ארויף מיט 8.2 פראצענט פון 2022

די צאל וויילער וואס זענען שוין ארויסגעקומען שטימען האט דערגרייכט 55.7% ביז 4:00 נאכמיטאג, לויט די אפיציעלע ציפערן פון די צענטראלע וואל קאמיטע.

דאס איז א שפרונג פון 8.2 פראצענט קעגן די 47.5% וואס מען האט געהאלטן אין די זעלבע צייט ביי די וואלן אין 2022. לשם פארגלייך, אין 2021 האט עס געהאלטן ביי בלויז 42.3% און אין 2020 ביי 47.0%.

די קלפיס וועלן זיך אפיציעל פארמאכן 10:00 ביינאכט.

5:00 נאכמיטאג ארץ ישראל צייט — וואלן גייען אריין אין די אוונט שעה'ן בעת נתניהו שטייט פאר א קריטישע קאאליציע פראבע 

די וואלן גייען אריין אין די שפעטע נאכמיטאג און אוונט שעה'ן, ווען פרעמיער מיניסטער בנימין נתניהו און די אפאזיציע פארטייען קעמפן פאר קאנטראל פונעם 120-זיץ כנסת. קלענערע פארטייען, אריינגערעכנט ש"ס און יהדות התורה, קענען שפילן א קריטישע ראלע אין די קומענדיגע קאאליציע פארהאנדלונגען. די קלפיס וועלן זיך שליסן 10:00 ביינאכט, און גלייך דערנאך וועלן ארויסקומען די עקזיט פאולס.

4:00 נאכמיטאג ארץ ישראל צייט — אומגעווענליך הויכע צאל וויילער באריכטעט

די שטימען ראטע האט דערגרייכט 44.9% ביז 2:00 נאכמיטאג, אין פארגלייך צו 38.9% אין 2022. איבער דריי מיליאן אידן האבן שוין אפגעגעבן זייער שטימע, וואס דאס צייכנט אפ די העכסטע ראטע פאר די דאזיגע שעה זינט יאר 1973.

3:00 נאכמיטאג ארץ ישראל צייט — קלפיס מעגן בלייבן אפן נאך 10:00 ביינאכט

די צענטראלע וואל קאמיטע מעלדט אז וויילער וואס וועלן אנקומען צום קלפי פאר די אפיציעלע 10:00 ביינאכט שלוס צייט, וועלן באקומען די רעכט אפצוגעבן זייער שטימע, אפילו אויב די לאנגע ליינס וועלן פאדערן אז די שטים בודקעס זאלן בלייבן אפן שפעטער ווי געפלאנט.

10:55 אינדערפרי ארץ ישראל צייט — דריי ארעסטירט אין נגב איבער פארדאכטן פון וואלן שוחד

די פאליציי האט איבערנאכט ארעסטירט דריי פארדעכטיגטע אין די נגב ראיאן איבער פארדאכטן פון טיילן שוחד פאר וויילער, נאכדעם וואס מען האט געפונען קאווערטן אנגעפילט מיט צענדליגע טויזנטער שקלים צוזאמען מיט וואל מאטעריאלן פאר די אראבישע 'רע"מ' פארטיי.

די פאליציי פארדעכטיגט אז דאס געלט איז געווען געצילט צו קויפן שטימען פאר רע"מ.

די ארעסטירטע, איינוואוינער פון די שגב שלום און ערוער געגנטער, זענען אריינגענומען געווארן פאר אויספארשונגען. די רע"מ פארטיי האט זיך ארויסגעשטעלט קעגן די פאליציי שריט, טענה'נדיג אז מען פרובירט צו שטערן זייערע וואל אקטיוויטעטן.