בס"ד

איראן טענה'ט: מיר האבן אראפגעברענגט אן אמעריקאנער דראון גאנצערהייט נעבן דעם שטרייט אוו הארמוז


די איראנער 'פארס' נייעס אגענטור באריכטעט אז אן אמעריקאנער "MQM-170" דראון איז אראפגעברענגט געווארן גאנצערהייט, מערב זייט פונעם 'שטרייט אוו הארמוז'. לויט די איראנער רעוואלוציאנערע גווארדיע (IRGC) נעיווי, האט זייער עלעקטראנישע קריגספירונג אפטיילונג באוויזן איבערצונעמען קאנטראל אויף די דראון'ס סיסטעמען און עס סוקסעספול געלאנדעט, אנשטאט עס אראפצושיסן פונעם הימל.


אויב איז דאס טאקע אמת, מיינט דאס אז אן אמעריקאנער פליגער געפינט זיך יעצט אין איראנער הענט כמעט אן קיין שאדן, וואס דאס איז פונקט די סארט געווינס מיט וואס טעהראן גלייכט זיך צו גרויסן. איראן טענה'ט אויך אז די דראון האט זיך געהויבן פון א בארטן אין איינע פון די גאלף לענדער אויפן דרום זייט פונעם וואסער-וועג. אויב דאס ווערט באשטעטיגט, קען עס אויפברענגען ערנסטע דיפלאמאטישע פראבלעמען פאר יענע לאנד.


עס איז וויכטיג אנצומערקן אז די אלע דעטאלן קומען בלויז פון איראנער קוועלעס, און דערווייל איז נישט דא קיין שום אומאפהענגיגע באשטעטיגונג איבער די דראון, די לאנדונג, אדער פון וואו עס האט זיך געהויבן. די באריכטן קומען אין א צייט פון גרויס אנגעצויגנקייט אינעם ראיאן. איראן האט דערקלערט דעם שטרייט אוו הארמוז אלס פארמאכט דורכאויס די מאנאטן-לאנגע ראיאנישע מלחמה, און די רעוואלוציאנערע גווארדיע האט לעצטנס געמאלדן אז זיי האבן פארכאפט אמעריקאנער אונטערוואסער דראונס.


וואשינגטאן האט אפגעווארפן כאטש איינע פון די פריערדיגע טענות, אנרופנדיג עס א "פארצווייפלטע" שריט, און האט געזאגט אז אן אנדערע כלי האט פשוט געהאט א טעכנישע פראבלעם. די גרויסע פראגעס יעצט זענען צי איראן קען ברענגען באווייזן אויף זייערע ווערטער, ווי אזוי פונקטליך זיי האבן איבערגענומען קאנטראל פונעם פליגער, און צי אמעריקע אדער דאס גאלף לאנד וועלן רעאגירן צו די באשולדיגונגען.