מאסיווע שווינדל אויפגעדעקט: איבער 830,000 פאלשע אקאונטס גענוצט צו גנב'ענען פעדעראלע סטודענט הילף דורך 'עי-איי'


די יוסטיץ דעפארטמענט זאגט אז זיי האבן אויפגעדעקט א ריזיגע און פארצווייגטע שווינדל סכעמע וואס צילט אמעריקאנער בירגער וועלכע האבן קיינמאל נישט אריינגעטרעטן אין א קאלעדזש קעמפוס. לויט באאמטע, האבן פארברעכער געגנב'עט פערזענליכע אינפארמאציע פון מענטשן און עס גענוצט צו קרירן פאלשע "סטודענטן", און דערנאך האבן זיי ארויסגעצויגן פעדעראלע פינאנציעלע הילף (פינאנשעל עיד) וואס ווערט באצאלט דורך די שטייער צאלער.


באריכטן איבער די מעלדונג צייגן אז אינוועסטיגעיטארס האבן אנגעצייכנט מער ווי 830,000 מעגליכע שווינדלערישע אקאונטס. די אפעראציע איז אנגערופן געווארן דורך די אויספארשער אלס "אפעראציע גאוסטבאסטערס". דער אסיסטענט אטוירני דזשענעראל, קאלין מעקדאנאלד, האט עס אראפגעמאלן אלס אן ארגאניזירטע שווינדל אויף א מאסיוון פארנעם, און נישט סתם א רייע פון איינצלנע טעותים. קרבנות זענען אידענטיפיצירט געווארן איבער'ן גאנצן לאנד, און טייל פון זיי ווייסן אפילו נישט אז זייער אידענטיטעט איז גענוצט געווארן ביז זיי באקומען פלוצלינג א חוב אדער א פראבלעם מיט זייער קרעדיט סקאר.


וואס מאכט די סכעמע אזוי שוידערליך איז וויפיל פון די ארבעט איז אנגעבליך געטאן געווארן דורך 'עי-איי' (ארטיפישעל אינטעלידזשענס). מעקדאנאלד זאגט אז די שווינדלער האבן גענוצט עי-איי אויסצופילן קאלעדזש אפליקעישאנס, אריינגעבן סקול ארבעט, און אפילו מאכן דעם אנשטעל ווי א סטודענט זיצט און האלט מיט ווירטואלע קלאסן. דער ציל, האט ער ערקלערט, איז צו האלטן דעם "גייסט סטודענט" אין סקול ווי לענגער מעגליך, כדי די שולעס זאלן גלייבן אז אן עכטער מענטש לערנט דארט און די רעגירונג הילף זאל ווייטער פליסן.


די קלאגעס זענען דערווייל בלויז באשולדיגונגען און זענען נאך נישט אויפגעוויזן געווארן אין געריכט. דאך ברענגט די קעיס ארויף ערנסטע פראגעס פאר פאמיליעס און קאלעדזשעס צוגלייך, ווי אזוי א מענטש וואס עקזיסטירט בכלל נישט קען אדורך גיין אלס א סטודענט פאר אזוי לאנג. עס ברענגט אויך ארויף די פראגע וואס א מענטש דארף טאן אויב זיין נאמען פאפט פלוצלינג ארויף אויף א לאון וואס ער האט קיינמאל נישט ארויסגענומען.